Baucau –  Loron 22 Janeiru Família Saleziana ( ADMA, AA, Komunidade Edukativa, Oratorianu no Infánsia Misionária ) mai halibur hamutuk iha komunidade St. Teresa D’Avila, selebra hamutuk Eukaristia hodi hasae hahi no agradese ba Maromak we matan santidade nian. Selebrasaun Eukaristia ne’e iha intensaun rua: ida mak selebra festa Beata Laura Vicuña no daruak, nu’udar agradesimentu ba madre Provinsiál Alma Castagna, FMA nia prezensa, ne’ebé halo vizita kanónika iha komunidade ne’e.

Selebrasaun Eukaristia prezide husi amu Pároku Pe. Justiniano Sousa, SDB. Iha omilia amu pároku hateten katak Laura Vicuña maski ho idade ki’ik hatene fó sasin kona-ba Kristu hodi defende valor sira moris nian. Nia (Laura) sente ki’ik forsa laiha atu bele troka situasaun ne’ebé ninia inan hasoru maibé nia laran metin ba Maromak katak Maromak sei tulun nia no sei tulun ninia inan atu bele moris fali iha dalan Maromak nian.

Depoizde misa merenda hamutuk nu’udar família. Hafoin kontinua ho atraksi sira ne’ebé prepara husi grupu sira.

Saun Francisco de Sales mak nu’udar Padroeiru ba kongregasaun Saleziana husi nia DB foti inspirasaun liu-liu kona-ba ninia laran manas ba klamar sira no ninia laran kmaus ne’ebé santu ne’e iha. Nune’e grupu Infánsia Misionária mak hatudu drama kona-ba santu ida ne’e nia moris.

DB nia hakarak ida deit mak hare foinsae sira haksolok agora no iha moris rohan laek. Maibé la’ós ne’e deit nia mak santu ida ne’ebé hadomi kreda no mos Amo Papa nune’e nia iha mehi kona-ba sira mehi ne’e mak kona-ba “ Ai-riin Rua” nian (aprezentasaun husi oratorionu sira).

Frutu husi DB nia sistema Edukativu mak Beata Laura Vicuña.  Nune’e grupu Laura mak aprezenta kona-ba Laura Vicuña nia amizade ho Merceditas. Maske santu nain rua nia loron la dauk to’o atu selebra maibé grupu sira ne’e hakarak haksolok ho madre Provinsiál no ba ema hotu ne’ebé partisipa Eukaristia iha loron ne’e.

Depoizde atraksi, madre Provinsiál mos hato’o lia menon ruma ba ema hotu ne’ebé prezente; hodi husu pergunta kona-ba primeira leitura nian ne’ebé dehan katak; ”povu ne’ebé iha nakukun laran hare naroman boot ida” nune’e madre husu se mak naroman boot? Labarik sira hatán katak Jezús Kristu. Ho ida ne’e madre hatutan katak imi ne’ebé ohin mai halibur iha ne’e imi haka’asan atu sai naroman ba sira ne’ebé ohin la mai. Hafoin ida-idak fila ba ninia hela fatin.

(Alice Gama)