Dili – Tuir tradisaun saleziana, tinan-tinan família sira husi Irmán FMA nian nafatin halibur hamutuk hodi halo festa Sagrada Família nian. Tanba tinan 2016, festa Sagrada Família la monu iha domingu, nune’e ohin, 08/01/2017 halibur hamutuk iha gymn, Komunidade Beata Eusebia Komoro, hodi realiza festa ne’e ho ksolok.

Molok hahú programa seluk, Ir Alma Castagna provinsiál TIN fo uluk ninia liafuan bemvinda ba família hotu ne’ebé mai partisipa iha festa ida ne’e. Nia dehan: “Ita babain nafatin hamutuk hodi selebra festa ne’e iha dia 29  Dezembru Festa Sagrada Família nian, maibé tanba situasaun la permite ita troka no selebra fali ohin hamutuk ho festa Epifania Nain nian. Tebes, imi hanesan ema matenek-na’in tolu ne’ebé buka atu komprende no saran imi nia rikusoin ba Maromak iha momentu profisaun imi nia oan sira nian. Obrigada ba imi nia karan moris nian. Ho festa ida ne’e tulun ita atu hafoun ita nia hakarak hodi entrega oan ba Maromak, tempu hanesan hafoun mós ita nia domin no prezente ba Maromak. Hametin imi nia moris nu’udar família”.

Iha Oradór sira ne’ebé ko’alia ba família, halo ho estilu painel eh “mesa redonda” modera husi Sr Cipriano Freitas. Panelista sira mak:  Dr. Rui Gomes, Dr. José António Gusmão-Miguel,  Padre Yohanes Laba Tolok, Sdb,  Ir. Olga Belo FMA, Afonso Alves Soares ( reprezentante Joven).  Oradór sira ne’e fahe esperiénsia kona-ba “Somos  Família” tuir tema Reitór-Mor nia estreia ba Família Saleziana, liuliu liga ho edukasaun oan sira-nian.

1. Ir Olga Belo, FMA foka tema: uma ida-idak mak eskola domin moris nian
2. Pe Yohanes Laba Tolok, Sdb. nia ko’alia kona:

• Família mak Maromak nia planu ba feto no mane atu moris hamutuk
• Família ne’ebé loos mak wainhira hela hamutuk iha uma, tau matan ba malu no bele hala’o moris iha ksolok

3. Joven Afonso Alves soares, nia haree husi pontudevista nu’udar joven, nia fahe esperiénsia kona-ba família divorsiadu ne’ebé afeta ba oan sira nia dezenvolvimentu umana. Família kompostu husi: Aman, inan no oan.
4. Dr. Rui Gomes fahe esperiénsia kona-ba família hanesan instituisaun istóriku, tuir reflesaun ema nian. Família di’ak ida hatene oinsá atu moris iha Maromak nia grasa, tanba prosesu edukasaun oan ida nian hahú husi 0 to’o 5 iha família laran, liu ida ne’e valór sira seluk husi li’urmak tama.
5. Dr. José António nia ko’alia kona-ba família ne’ebé uza kakutak / intelijénsia hodi eduka família ne’ebé sei harii nasaun ne’ebé di’ak no forte. Família la perfeitu maibé ita buka moris hodi aprende esperiénsia pasadu no no mori siha prezente sei tulun ita atinje moris ne’e ho di’ak. Atu klaru liután mai ita ba haree iha Luk. 6, 43-46.  Famila mak abut ba sosiedade nia susesu.

Iha omilia Pe. Apolinario (superior SDB ITM) salienta liután kona-ba Evanjellu ohin nian, “ita sarani sira la’o tuir fitun nia naroman hodi ba hasoru Makso’in ida ne’ebé lori dame no domin mai ita.”

Nia hatutan tan katak, “iha Belém, fatin kiak ida mak Maromak hatudu nia mistériu boot ne’ebé lori ba oin Ninia Salvasaun ne’ebé nakfilak an sai ai-han espirituál ba ita tomak. Maromak nia beleza iha festa Epifania ne’e nu’udar esperensia Maromak hatudu an ba ita nu’udar esperiénsia ida ne’ebé Maromak fó atensaun ba ita iha dalan salvasaun, fidelidade no fiar nian.  Ohin ita mós selebra mistériu fiar, esperansa no domin nian”.

Remata tiha Eukaristia kontinua kedas ho konfraternizasaun ho konvidadu sira no família Irmán sira hotu nian.

(Ágata Freitas – Ines Bartolo)