Dili – Departementu “Pastoral da Criança” Dioseze Dili nian iha Tinan Fiar nian prepara livriñu “Katekeze ba labarik – Tinan Fiar” hodi fahe ba labarik sira pertense ba grupu kategoriál oioin iha parókia sira. Livriñu ne’e nia objetivu mak “labarik sira hatene no sai konxiente kona-ba tinan ida-ne’e, Tinan Fiar nian, ne’ebé Papa eméritu Bento XVI propoin ba sarani hotu atu hakle’an, hafoun no haklaken fiar sarani”.

Hola parte iha komisaun preparasaun nian irmán Zélia Matos Lemos FMA hamutuk ho irmán sira seluk hanesan irmán Alexandrina B. Ximenes MLC (koordenadora Pastoral da Criança diocesana), irmán Celina Lopes ESEMD (Capacitadora Pastoral da Criança diocesana), irmán Jacinta Vifigal FDCC, irmán Domingas Dias FDCC, irmán Rosalina Amorim Pereira, Ocarm, irmán Alzira Fátima dis Reis OP no irmán Maria da Luz FFDP.

 

Tinan Fiar ne’ebé hahú iha loron 11 Outubru 2012 no sei remata iha 24 Novembru 2013, ho festa Kristu Liurai. Labarik sira dioseze Dili nian halo abertura ba sira-nia dalan Tinan Fiar nian iha loron 15 Dezembru 2012, ho Misa solene iha Katedrál Dili nian hamutuk ho Amu-Bispu Alberto Ricardo. Iha loron ne’ebá estudante sira Escola Maria Auxiliadora, Comoro mak anima liturjia. Amu-Bispu husu labarik sira atu hakle’an didi’ak sira-nia fiar hodi badinas tuir katekeze. Livru ne’ebé loloos iha planu atu fahe iha loron ne’e la konsege fahe, tanba parókia barak la partisipa, nune’e, Bispu husu atu membru sira Pastoral da Criança mak lori diretamente ba entrega iha parókia sira durante tempu ne’e. Nune’e mak horisehik, 5 Maiu, ir. Zelia no ir. Alexandrina lori ba entrega iha parókia Imaculada Conceição (Catedral de Dili).

Maski Tinan ne’e la’o ona to’o iha klaran, maibé parókia barak seidaun hala’o atividade espesífiku ba Tinan ida-ne’e, inklui parókia Maria Auxiliadora Comoro. Iha nivel universál fali, ita haree ona atividade oioin ne’ebé hala’o hanesan iha domingu dalimak Páskua nian krizmandu sira husi mundu tomak halo sira-nia pergrinasaun ba Roma no balun simu sakramentu Krizma husi Papa Francisco. Domingu daneen Páskua nian, horisehik, loron ikus peregrinasaun Irmandade sira-nian ne’ebé taka mós ho selebrasaun Eukarístika ho Papa Francisco ne’ebé rekomenda sira atu moris tuir Evanjellu, atu iha komuñaun metin ho Kreda no atu sai misionáriu iha sira-nia fatin.