Dili – Liu husi biban ida ne’e, ami hakarak hato’o ami nia agradesimentu ba madre Provinsial, me. Alma Castagna, madre sira no formadora sira ne’ebé fó ona oportunidade mai ami atu bele kontinua ami nia aprendizajen iha Centro Formasaun João Paolo II, Comoro-Dili no ami hakarak mos hato’o ba ita boot sira katak ami sente kontente tebes hala’o ami nia formasaun ne’e.

Durante ami estuda iha ETV “Sta. Maria D. Mazzarello”, Venilale no curso Costura iha Fuiloro, ami simu materia iha teoria no pratika maibé ami ladun iha konhesimentu  klean tanba falta de ekipamentus. Nune’e iha tinan ida ne’e ami sente kontente tebes tanba ami bele hetan oportunidade diak atu aprende no aumenta / haklean liu tan ami nia konhesimentu kona ba ami nia aera Hotelaria, Alimentar no Costura.

Iha tempo formasaun ida ne’e mos prepara ami atu sai ema ne’ebé hamriik mesak no sai ema ne’ebé profesional duni atu tama iha kampu de servisu. Ami mos aprende atu hatene poupa osan tanba ami simu salariu sufisiente husi madre sira. Hodi salariu ne’e, ami bele uza ba ami nia nesesidade, restu balun ami bele rai no uza fali atu bele kontinua ami nia estudus iha universidade.

Ho ami nia haka’as-an hirak ne’e hotu ikus mai ami bele hetan sertifikadu ho valor ne’ebé diak atu nune’e balun ne’ebé hakarak atu kontinua nia estudu bele kontinua no balun ne’ebé la bele kontinua estuda iha oportunidade atu bele ba serbisu iha fatin seluk ne’ebé presiza.

Ikus liu ami hakarak hato’o ami nia agradese wain ba Aman Maromak ne’ebé haraik nafatin grasa isin diak mai ami atu bele hala’o ami nia knar lor-loron ho diak. Ami agradese ba madre sira no mos ba formador sira hotu nia dedikasaun tomak. Dala ida tan ami hato’o obrigada wain ba buat hotu ne’ebé ita fahe ba malu ona durante iha tinan ida ne’e nia laran.

30 Dezembru 2016

Maria Albertina