Baucau – Ohin loron 28 Dezembru mak loron ne’ebé Santa Kreda dedika ba santu inosentes sira ne’ebé mate. Iha loron hanesan komunidade FMA S. Teresa d’Avila, Teulale hamutuk ho komunidade edukativa, ADMA, reprezentante konsellu parokiál, Antiga Aluna, OPIAM no oratorianu sira  selebra festa Natal hamutuk ho Amu Bispu Don Basilio iha salaun parokial  St.António vila antiga, hanesan tinan-tinan halo.

Festa ne’e  ninia objetivu mak atu fahe ksolok ba malu basá Maromak hadomi tebes ita to’o haruka Ninia Oan Mane mai iha mundu. Iha parte seluk, liu husi festa ne’e bele harii relasaun ne’ebé di’ak liu tan atu bele serbisu hamutuk hodi hatán ba Kreda lokal nia presiza.

Festa ne’e hahu ho orasaun badak ne’ebé labarik sira mak diriji hafoin ho ksolok sira hatudu ba Amu Bispu no komunidade edukativa sira, drama simples kona-ba Natal nian ho títulu “ Anju Mensajeiru Ida”. Depoizde drama Amu hanorin kanta “ Dumlai, Dumlai ba labarik sira no  ba komunidade edukativa sira hafoin  fó liafuan ikus hodi dehan katak: “ iha situasaun ohin loron nian buat barak ema lori mai iha nasaun ida ne’e atu sobu familia no estraga labarik sira. Maibé bainhira inan-aman halo juramentu iha loron kazamentu nian katak sei taumatan ba labarik sira ne’ebé Maromak entrega ba sira. Nune’e familia iha responsável atu  eduka labarik sira. Uma kreda mós iha ninia knaar atu tulun labarik sira liu husi grupu sira ne’ebé eziste  hanesan: Akólitu, THS/THM, Escuteiru, OPIAM no oratóriu atu labarik sira sai rai ne’ebé bokur no fini ne’ebé di’ak, liu-liu bele metin nafatin ba Fiar nia hanorin sira. Rona tiha liamenon espirituál ida ne’e, merenda hamutuk nu’udar familia, hafoin fila ba idak-idak nia hela fatin.

Ema hotu haksolok no kontente  tebes basá bele halibur hamutuk ho ninia Bibi Atan hodi fahe ksolok ne’e.

(Alice Gama)