Sidade Vaticano – “Loron Irmandade no Piedade Populár nian” halibur iha Roma, husi sesta to’o ohin membru husi asosiasaun/ irmandade liu 50.000 husi Itália no mundu tomak ba sira-nia peregrinasaun iha Tinan Fiar nian ne’ebé taka ho Misa iha Prasa S. Pedro ho Papa Francisco.

Amu-Papa hahú hodi agradese sira-nia prezensa korajoza maski udan, hodi subliña katak irmandade sira mak realidade ida ho tradisaun boot iha Kreda no iha tempu ikus ne’e sai objetu renovasaun no redeskoberta nian.

Bazeia ba leitura sira domingu nian, Papa Francisco artikula nia omilia ho eixu/riin tolu: evanjelisidade, eklezialidade, misionariedade.

Evanjelisidade, bainhira “fiar sarani tomak tau iha sentru relasionamentu ho Aman, Oan no Espíritu Santu”, Amu-Papa dehan. Ne’e mak ita-nia fiar nia pontu hahú nian no pontu to’o nian: “hadomi Maromak, sai dixípulu Kristu nian, hodi moris Evanjellu” . Hodi sita Bento XVI ne’ebé uza liafuan evanjelisidade bainhira ko’alia ba irmandade sira, Papa Francisco fó hanoin ba sira katak sira mak rikusoin ida ba Kreda, rikusoin ida ne’ebé bispu latinu-amerikanu sira define “místika ida” “espasu ida enkontru nian ho Kristu”. Nia husu sira atu kontinua hemu husi bee-matan ne’e no keta haksolok ho moris sarani medíokre…

Nia hatutan tan katak iha istória “Irmandade sira mak fatin provasaun santidade nian ba ema barak, ne’ebé moris ho simplisidade relasaun intensa ho Na’i. Imi la’o ho desizaun bá santidade; keta kontente ho moris sarani medíokre, maibé imi-nia prezensa estímulu, hahú husi imi rasik, atu hadomi liután Jezús Kristu.”

Eklezialidade. Dala ida tan Papa Francisco foti fali liafuan husi Bento XVI ba irmandade sira. Liafuan ne’e fó hanoin kina-ba reuniaun/konsíliu dahuluk dixípulu no katuas sira nian  ne’ebé ohin ia rona iha leitura dahuluk atu define buat sá loos mak esensiál, katak fiar iha Jezús Kristu Mate no Moris-Hi’as. Amu-Papa subliña “oinsá supera difikuldade sira, la’ós ih ali’ur, maibé iha Kreda nia laran”. Ne’e mak eklezialidade. Piedade populár lori ba esensiál – Amu-Papa dehan – “se moris iha Kreda laran iha komuñain kle’an ho bibi-atan sira.”

Hodi asegura ba irmandade sira Kreda nia domin, nia fó hanoin katak bispu latinu-amerikanu sira define irmandade nu’udar “maneira lejítima ida atu moris fiar, modu ida atu sente nu’udar parte Kreda nian”, no konvida sira atu sai pulmaun loos Kreda nian: “Hadomi Kreda! Husik nia gia imi! Iha parókia sira, iha dioseze sira, imi sai pulmaun loos fiar no moris sarani nian”.

Aspetu datoluk Amu-Papa subliña iha omilia mak misionariedade. Hatudu tiha karakterístika no sinál sira irmandade ida-idak nian, Amu-Papa fó hanoin katak sira-nia misaun espesífika mak “mantein moris relasaun entre fiar no kultura sira pertense bá nu’udar Povu”. Nia husu sira atu halo ida-ne’e ho jestu sira ne’ebé envolve “sentidu sira, sentimentu sira, símbolu sira-nia kultura nian”. Jestu ne’ebé tenke hatudu sentralidade Paixaun, Mate no Resureisaun Kristu nian iha sira-nia an rasik no iha komunidade. Halo nune;e sira lori Kristu ba ema simples sira, ema ki’ik sira. Ne’e mak jestu evanjelizadór – Papa Bergoglio salienta – hodi husu irmandade sira atu sai evanjelizadór loloos, sai ponte ne’ebé lori ba Kristu, basá ema sarani ida-idak no komunidade ida-idak mak  misionária se nia treansmite no moris Evanjellu no fó sasin kona-ba Maromak nia domin liuliu iha relasaun ho sira ne’ebé hasoru difikuldade… Nia remata nune’e:

“Evanjelisidade, eklezialidade, misionariedade – liafuan tolu – keta haluha sira: evanjelisidade, eklezialidade. Ita husu Na’i atu orienta nafatin ita-nia neon no ita-nia fuan ba Nia, hanesan fatuk moris Kreda nian, atu iha ita-nia atividade ida-idak no ita-nia moris sarani sai sasin nabilan ninia laran-sadia np domin. Nune’e ita sei la’o ba ita-nia peregrinasaun iha rai nia rohan, ba Jerusalém Lalehan nian. Iha-ne’ebá la iha ona templu ida: Maromak rasik no Bibi-Oan mak templu; no loromatan no fulan nia roman fó fatin ba Na’i leten aas bá nia glória. Assim seja.”

Molok orasaun Regina Coeli no bensan finál, Amu-Papa hato’o nia saudasaun espesiál ba Kreda Orientál ne’ebé ohin selebra Páskua. Nia mós hanoin beatifikasaun Francisca de Paula de Jesus, koñesida nu’udar “Nhá Chica”, “Kiak sira nia Inan”, iha Brazíl.

Iha okaziaun ne’e, ne’e kumprimenta Asosiasaun “Meter” ne’ebé ohin dedika loron ne’e ba labarik sira vítima violénsia nian, hodi husu atu hotu-hotu defende labarik sira. Nia hateten: “Ha’u hakarak asegura katak sira nafatin iha ha’u-nia orasaun, maibé ha’u mós hakarak dehan ho forsa katak ita hotu tenke haka’as an iha klareza no aten-barani atu ema ida-idak, liuliu labarik sira, ne’ebé pertense ba kategoria vulneravel liu, atu ema defende no proteje nafatin sira”.

Misa remata, maski udan, nia hale’u ho kareta atu kumprimenta sarani no peregrinu sira nakonu iha Prasa S. Pedro.