Venilale – Moris no fahe ksolok hamutuk iha Na’I nia naran mak elementu  esensial ba ita nia moris nu’udar Salesiana/u tuir espíritu Don Bosco no Madre Mazzarello nian hodi tulun malu ba dalan santidade liu husi komuñaun ne’ebé lori ba serbí hamutuk nian. Ohin, 25/12/2016 ami komunidade Maria Auxiliadora, Komunidade Maria Mazzarello no komunidade SDB venilale; Hamutuk selebra festa Natal hodi kumprimenta malu liu husi ami nia konfraternizasaun hamutuk iha uma Maria Auxiladora, Uma Mornese dahuluk nian iha Venilale.

Ami hamutuk forma espíritu ida ho klamar ida hodi hamoris espíritu fraternu nian ne’ebé uluk hahú ona maibé depois la kontínua tanba ho razaun oioin. Nune’e atu haforsa deit katak Ksolok mak karakteristika salesiana/o nian ne’ebé nafatin fahe. Depoizde han ami komprimenta malu ho knananuk Natal nian ne’ebé ami prepara tuir ida-idak nia kreatividade, ami MA (Kanta; O Holy Night no Tu scendi Dalle Stelle), iha ne’ebé bele haree no sente hanesan iha pasajem Evanjellu nian ne’ebé dehan: “Imi mak Ha’u nia eskolante sira wainhira imi hadomi malu”  (João 13, 35).

Molok Padre sira no ho Frater sira aprezenta sira nia númeru, Padre José de Sá fó ninia mensajen ba ami FMA ida-idak, nia foti fila fali, Madre Jacinta Gusmão nia liafuan ne’ebé dehan uluk Padre Jose Vataparambil nia tempu Komunidade tolu ne’e nafatin lao hamutuk. Nune’e ho kosok oan nia moris iha ita le’et; lori mai ita naroman paz nian hodi moris iha paz ho ita nia moris rasik, mai ita hamutuk kontínua haburas espíritu fraternu nian ida ne’e hodi fahe moris no ksolok  hamutuk tuir data sira ne’ebé ita determina ona. (13 de maio iha kom. MM, 24 de maio iha kom. MA no 31 de Janeiru iha kom. SDB)

Nu’udar konkluzaun Padre José fo bénsaun hodi taka ho músika “Hinos de glória”.

(Agata Freitas)