Baucau – Grupu ‘acólito’ sira husi parókia rua Baucau nian (Sagrado Coração no Santo António) hamutuk na’in 100 ida halo retiru preparasaun Natál nian ne’ebé Ir Jacinta Gusmão FMA mak fasilita. Retiru ne’e halo husi loron 20-21 Dezembru, iha salaun dioseze nian, ho tema “Acólito, hodi moris husi Eukaristia sai servi-na’in Kristu no komunidade nian”.

Atividade hahú iha loron 20 loraik, hodi fahe sira ba grupu 6 no ida-idak hili ninia naran ho nia xefe no halo sira-nia ‘bans’. Hafoin depoizde orasaun hahú nian sira simu input kona-ba “Acólito nu’udar serví-na’in”. Hafoin iha grupu sira foti empeñu eh kompromisu atu oinsá serví loron tuirmai durante sira-nia retiru ne’e. Ho livre grupu ida-idak oferese an atu hamoos fatin sira ne’ebé sira uza nune’e mós prepara sasán ba selebrasaun eukarístika loron enserramentu nian. Sira mós haree filme ida ho títulu “For greater glory” kona-ba adolexente José Luis ne’ebé sai ona santu husi México. Labarik ne’e acólito ne’ebé barani fó sasin ba Kristu maski nia hetan tortura no ema oho. Hotu tiha filme sira halo momentu ida adorasaun eukarístika molok han kalan.

Loron tuirmai, sira kontinua reflete kona-ba “Serví-na’in hanesan Kristu, hodi besik liu ba Nia iha sakramentu Eukaristia”. Liuhusi modalidade “Rally” sira hakle’an liután kona-ba identidade acólito no servisu ne’ebé sira halo iiha Kreda no durante selebrasaun litúrjika. Hafoin, grupu ida-idak foti empeñu moris nian ne’ebé sira halo durante selebrasaun eukarístika, depoizde leitura Evanjellu nian.

Esperiénsia ne’e sai momentu di’ak ba labarik no adolexente acólito sira atu haburas amizade entre sira no habiit sira-nia identidade acólito nian. Ita hein sira bele sai, loos duni, servi-na’in Kristu no Komunidade sarani nian.