Dili – Iha loron 1 Maiu to’o loron 5, membru Rotaract – klube Rotary nian ba foin-sa’e sira – na’in 30 mai husi Australia, no nasaun seluk Europa, Amérika no Ázia nian halibur iha Centro João Paulo II inklui membru Rotaract Dili nian ne’ebé loloos hamutuk na’in 67, kuaze hotu estudante “Universidade Nacional de Timor-Leste”.

Sira nia objetivu mak atu hala’o Konferénsia Rotary Club nian iha Dili ho tema “Peace through Service”. Konferénsia ne’e rezultadu kolaborasaun entre Rotary no Peace Jam Foundation.

Rotary mak organizasaun mundiál business no lider profisionál sira-nian ne’ebé fó servisu umanitáriu no enkoraja padraun étiku aas iha profisaun hotu. Rotary Foundation mak organizaun nonprofit Rotary International mak sosiedade/korporasaun ida ne’ebé promove servisu umanitáriu no edukasionál no interkámbiu kulturál. Sira-nia kompromisu mak “Service Above Self”. Rotary Club eziste mós iha Dili (Timor-Leste) ne’ebé hahú iha tinan 2000. Atualmente nia nia prezidente mak australianu ida ho naran Antonio Favaro.

Rotary iha mós asosiasaun ida ba foin-sa’e sira ho idade 18-30  hanaran Rotaract (Rotary in Action), no responsavel ba grupu ne’e mak Rotary Club lokál.  Rotaract iha Timor iha atividade oioin. Nia programa ida mak Youth Exchange Program no husi kedas 2005 tinan-tinan nafatin haruka foin-sa’e na’in rua feto ka mane iha Brazíl ho objetivu interkámbiu estudente nian.

Atu hatene kona-ba programa Rotaract iha Timor-Leste bele visita sira-nia website http://rotaryclubofdili-timorleste.com/.

Kona-ba PeaceJam Foundation, nia mak organizasaun internasionál ho misaun atu “kria lider foin-sa’e sira ho kompromisu ba mudansa pozitiva iha an rasik, sira-nia komunidade no mundu nian hodi foti inspirasaun husi premiadu Nobel Pás nian. Entre premiadu na’in 13 ne’ebé hola-parte iha Peace Jam, iha mós José Ramos-Horta, nune’e mak sira oras-ne’e servisu mós iha Timor-Leste. Nune’e mak iha loron rua ne’e nia laran 4-5 Maiu sira organiza Konferénsia Dahuluk ba Rotary/Rotaract iha Dili, Timor-Leste.

Atu hatene liután kona-ba Peace Jam bele vizita http://www.peacejam.org/affiliates/World-East-Timor-16.aspx#events.