Dili – Fahe ksolok hamutuk hodi agradese ba grasa oin-oin ne’ebé simu husi Na’i, tan Na’i kontinua haraik grasa matenek, grasa moris nian no grasa laran sadia ne’ebé simu lor-loron husi Na’i. Iha fulan dezembro mak fulan ida ne’ebé importante liu ba moris sarani nian, tanba ne’e molok menina sira ba halo ferias Natal nian iha uma, komunidade organiza atividade ho sira hodi selebra festa aniversario (tinan moris nian), retiru hamutuk, no ikus liu mak agradese ba grasa matenek nian ne’ebé simu husi Na’i.

Atividade sira ne’e hala’o durante loron tolu nia laran hahu husi loron 17-19. Iha loron primeiru dia 17 komunidade selebra festa aniversario ka tinan moris nian ba menina no madre sira ne’ebé selebra tinan iha fulan outubro, Novembro no Dezembro. Sira ne’ebé selebra aniversario moris nian hamutuk na’in 9 menina nain 7 ho madre na’in 2, me. Veronika no me. Ivonia (ne’ebé muda ona ba komunidade “Regina Pacis”-Jakarta). Selebrasaun tinan ida ne’e hahu ho orasaun vespras espesial hodi tau intensaun ba sira ne’ebé halo tinan no mós ba intensaun seluk tan ne’ebé ida-idak oferese. Hafoin kontinua ho reza tersu. Hotu tiha tersu, irmã no menina sira han hamutuk no komprimenta malu nu’udar familia ida no fó prezente ba malu.

Iha loron tuir mai, loron 18, komunidade oferese momento retiru ba menina sira ne’ebé hela iha residenza no sira nia kolega ne’ebé hela iha liur hodi prepara-an ba Na’i nia mai ne’ebé kontinua ho sakramentu rekonsiliasaun no novena iha Parokia. Sakramentu rekosiliasaun mak momentu diak atu hasoru Na’i, hodi esperiensia Na’i Nia domin no laran sadia. Nune’e molok hakbesik ba sakramentu ne’e, uluk knana’in hahu ho konferensia husi Me. Lucia Pereira Freitas, FMA. Iha konferensia ne’e madre koalia ba sira kona ba Maria nia disponibilidade total ba Maromak Nia bolu, hodi kolabora ba humanidade nia salvasaun. Depoizde konferensia, irmã no menina sira, hakbesik-an ba sakramentu konfesa husi padre Manuel Fraile, SDB. Ho oportunidade ne’ebé iha, ema hotu haka’as-an atu hakbesik-an ba sakramentu ne’e ho fiar no ho laran metin.

”Momentu atu agradese ba grasa matenek ne’ebé simu husi Na’i” Loron 19 Dez. Mak loron graduasaun ba estudante sira husi universidade DIT. Entre estudante sira ne’e, iha menina ida ne’ebé hola parte iha komunidade DP, menina ne’e mak Joaquina, Antigas Alunas husi ETV Venilale ne’ebé wainhira remata scola nia hela iha residenza durante tinan tolu servisu iha sentru produsaun (suku), depois nia kontinua nia estudus to’o remata ho valor diak (nia hetan fatin da-nen husi na’in 10). Nia sente agradese tebes ba Maromak tan nia bele remata nia estudu ho valor diak. Nia agradese ba me. Alma (me. Provincial ne’ebé la bele marka presenza) no madre sira ne’ebé ho disponibilidade hodi akompana no fó motivasaun ba nia atu bele realiza nia mehi. Iha momentu ne’e nia mos agradese liu ba nia familia ne’ebé suporta liu nia iha nia estudus maske hetan difikuldade barak atu sustenta-an maibe ho sira nia sakrifisiu, bele realiza nia mehi.

Ho sentimentu gratidaun ida ne’e mak nia hakarak hatudu agradesementu ba madre no familia hodi organiza han hamutuk ka almoço-confraternização nian. Almoço-confraternização ida ne’e prepara husi familia sira iha komunidade DP. Durante han hamutuk, Joaquina (Kiky) no familia sira sente orgulho no agradese ba madre Provinsial no madre FMA sira ne’ebé tau matan no akompanã Kiky. Husi komunidade, madre Veronika, hato’o liafuan no konvida atu agradese ba Maromak ba grasa ne’ebé familia simu ona husi Nia. Grasa ne’ebé nafatin akompanha nune’e Joaquina bele remata nia estudus no nafatin mantein nia-an nu’udar “menina”. Madre mos hato’o agradese ba Joaquina tanba durante hela iha residenza nia hatudu ninia sensu responsabilidade, holaparte no sai sasin ka ezemplu ba menina sira ne’ebé nia hela hamutuk. Liu-liu tanba nia persevere iha nia estudu no servisu tomak ne’ebé nia hala’o to’o remata. Husi Joaquina nia parte, nia husu ba alin sira liu-liu ne’ebé hela iha residenza atu usa oportunidade ne’ebé iha ho diak, hala’o ho seriu no responsabel kna’ar sira ne’ebé simu, iha eskola ka iha servisu naran de’it. Maski oinsa, madre sira nia presenza nafatin tulun no suporta ita ne’ebé mai husi familia semplis  atu bele hetan futuru ne’ebé diak.

(Miranda da Cruz)