Dili – Iha loron 14-15 Dezembru feto-raan na’in sanulu husi Ainaro, Manatuto, Ermera, Lospalos tuir retiru hamutuk ho Ir Alma, provinsiál no Ir Esmeralda, nu’udar koordenadora ba Ámbitu Formasaun. Iha kraik bele haree oinsá sira-nia programa no rezultadu sharing durante loron rua nia laran.

******

ENKONTRU VOLONTARIA

Madre Alma nia liafuan bemvinda ba sira; ho ksolok ami simu imi iha fatin ne’e, ita hamutuk iha loron rua ne’e atu buka buat ne’ebé Maromak rasik hakarak ba imi ida-idak. Tuir mai madre konvida sira aprezenta sira nia-an rasik iha grupu.

Apresentasaun husi sira ida-ida no hili simbolu ida atu espresa sira nia karakter; entre sira, balun hili aisar ne’ebé prontu nafatin atu bele uza no hamos didiak ambiente, seluk hili fatuk nudar sira nia karakter ne’ebé forte no to’os, balun hili aitahan hodi manifasta sira nia karakter ne’ebé la forte, mai noza, anin hu’u karik semo ba mai deit. Depoizde apresentasaun; Madre Provinsial esplika ba sira tuir sira nia karater ne’ebé hato’o ona hodi dehan; imi hotu deskobre karakter ne’ebé negativu, maibé ema ida-idak iha nia qualidade diak.

Volontaria sira hamutuk nain sanulu; sira mai husi fatin oin-oin: Lospalos,laclubar-Manatutu, Dili, Ermera, Ainaru.

 

ORASAUN ATU HAHÚ

Tema: “Mane klosan ida ne’ebé riku”(Mt, 19:16-22)

Madre Alma; Ita hotu hakarak hatene saida mak ita presiza halo atu bele hetan ksolok loos! Loron ida, foin-sa’e ida husu ba Jezús: “Mestre, ha’u sei halo buat di’ak sa atu hetan moris rohan laek?” Jezús hatan hodi esplika ninia hanoin, maibé foin-sa’e ida ne’e sente katak buat ne’ebé Jezús dehan la to’o. tanba, maski nia halo buat hotu, sedauk hetan ksolok loos…saida mak falta? Jezús hatene katak “ halo” buat barak la to’o atu fó ksolok ba ema. Atu hetan ksolok presiza hatene hili no laran metin ba buat ne’ebé hili ona. Maromak mak hili ona buat ne’ebé di’ak ba ita no nia marka ona ida-idak nia dalan, dalan ida ne’e bolu vakasaun. Bainhira ita hili di’ak no hili buat ne’ebé di’ak sei hasoru Maromak no sei deskobre nia hateken domin nian.

Na’i tulun ami atu hili didi’ak:

• Hanorin ami atu hili buat ne’ebé di’ak, katak atu hili Ita, Ida ne’ebé Di’ak! Tulun atu ami hili amizade ho Ita. Laran metin ba Ita-nia Liafuan, deseju atu halo ami-nia moris sai prezente ida ba maluk sira.
• Hanorin mai ami atu hili didi’ak, atu orienta ami-nia moris turi Ita-nia hakaran atu hili loos hodi hadomi maluk sira no renunsia ba buat ne’ebé la husik Ita tama iha ami nia fuan.
• Tulun ami atu rona domin bolun nian no atu komprende katak ami sei halo buat boot ruma se ami sei hasoru Ita hili hamtuk ho Ita.
• Remata loron ida ne’e ho Film: “Uma ksolok nian” (kona-ba madre Mazzarello)

 

Loron 15/12/2016

Lectio kona-ba “Mane klosan riku”

KOMPRENDE TESTU

• Mane klosan rasik halo pasu atu hakbesik ba Jezús. Jezús la bolu nia. Evangelista hotu konkorda katak ema riku no oinsá nia ko’alia ba Jezús parese foin-sa’e di’ak ida, ne’ebé iha hakarak boot atu moris tuir Maromak nia hakaran.
• Mane klosan hatán kedas katak nia moris tuir ukun fuan sira husi ki’ik kedas. Nia ema ne’ebé halo ona “dever” nu’udar ema fair na’in, maibé nia sente katak “hahalok di’ak sira” la to’o: presiza radikalidade forte liu atu bele manán Reinu lalehan nian.
• “Mai no tuir Ha’u”: ida ne’e de’it mak buat ne’ebé sentrál: Nia, la’os buat ne’ebé foin-sa’e lakon, la’os buat ne’ebé ema hanoin, maibé Jezús.

REMATA HO SELEBRASAUN FINÁL

Madre Alma nia mensajen atu bele tulun sira haree ba moris liu husi esperiénsia badak ne’ebé sira halo loron hirak liu ba, tulun sira ida-idak sei kontinua sira nia dalan, tuir buat ne’ebé Maromak hatudu ba sira. Pergunta ida ne’ebé sei akompaña sira ida-idak nia pergunta ba Jezús:“Ha’u bele halo buat di’ak sa?”. Iha ha’u nia moris, ha’u kontinua buka, hakarak no komprende Maromak nia planu ba ha’u, atu nune’e ha’u bele moris ho ksolok.

(Esmeralda Soares)