RV – Papa Francisco kontinua katekeze kona-ba esperansa sarani iha Aula Paulo VI, Vaticano, hodi destaka katak ba sarani ida,maski buat hotu parese lakon, maibé nia la lakon esperansa.

Download

Amu-Papa nia reflesaun tau iha sentru livru Isaías nian. Profeta haktuir kona-ba konvite ba Jerusalém atu fanun povu no hatais unuk festa nian, tanba Na’I mai liberta nia, no hatutan: “Ha’u-nia povu sei hatene ha’u-nia naran: ‘Ha’u horik iha ó-nia sorin!’”.

Papa Francisco esplika katak espresaun ne’ebé Maromak haktuir resume ninia vontade tomak salvasaun nian, basá, liberta tiha husi ezíliu, Israel bele hasoru Maromak no iha fiar, hetan fali nia an rasik. Hafoin, profeta hatama knananuk ida ezaltasaun nian, hodi dehan katak Jerusalém sei haklalak ho ksolok basá Maromak konsola ninia povu.

Isaías ninia dadolin refere ba milagre sira dame nian, maibé fó destake espesiál ba manu-ain ne’ebé la’o ho ain-hakat lais, atu haklaken libertasaun no salvasaun no haklaken katak Maromak ukun. Tuir Amu-Papa, ne’e mak liafuan sira fiar nian iha Na’i ho kbiit maka’as hakruuk ba umanidade atu oferese mizerikórdia no liberta ema. No domin boot ne’e ninia realizasaun mak instaurasaun Reinu nian husi Jezús, Reinu ida perdaun no dame nian selbra iha Natál no sei realiza definitivamente iha Páskua.

Amu-Papa afirma katak sira-ne’e mak motive esperansa sarani nian. “Bainhira buat hotu hanesan remata ona, bainhira mai tentasaun atu fiar katak buat ida la iha tan ona sentidu, mosu notísia furak ne’ebé ain-hakat lais sira-ne’e lori. Maromak mai dauduan atu realiza buat foun ruma, lulun nia faru liman sira no lori mai ita liberdade no konsolasaun; aat sei la manán ba nafatin, terus sei iha ninia rohan. Manán tiha ona dezesperu”.

Papa Francisco ssubliña katak ema hotu simu bolun atu hamriik no atende profeta nia konvite no sai mane no feto sira esperansa nian. “Aat liu bainhira sarani ida lakon esperansa, nee’bé hanoin katak buat hotu remata ona, ne’ebé haree de’it muru sira iha nia oin… Maibé Na’i hamonu muru sira ho ninia perdaun”.

Mensajen Liafoun Di’ak nian urjente, Papa Francisco hatutan, nune’e presiza halai hanesan mensajeiru, basá mundu labele hein, umanidade hamlaha no hamrook ba justisa, ba lia-loos no ba pás. “Hodi haree Kosok-Oan Belém nian, labarik sira mundu nian bele hatene katak promesa sei kumpri dunu: iha ki’ik-oan ne’ebé foin moris soi Maromak ne’ebé salva nia kbiit tomak. Presiza loke fuan ba  sai ki’ik no ba maravilla; maravilla Natál nian, ne’ebé, ne’ebé ita prepara dauduan an bá. Ne’e mak Maromak kosok-oan ninia surpreza, Maromak kiak ida, Maromak frajil ida, Maromak ida ne’e’e husik ninia grandeza atu sai besik mai ita ida-idak”.