Sidade Vaticano –Papa Francisco ohin husu iha Vaticano atu joven katóliku sira iha “korajen” atu hean “kontra korrente” iha sosiedade atuál, hodi aprezenta ba ninia kontemporáneu sira “ideál” boot sira fiar nian.

“Imi hela metin iha dalan fiar nian, ho esperansa segura iha Na’i. Iha ne’e mak segredu ita-nia dalan nian. Nia fó korajen mai ita atu bá kontra korrente”, nia hateten, iha omilia misa ne’ebé nia prezide iha Prasa S. Pedro, ho partisipante liu rihun atus ida iha loron mundiál krizmandu sira-nian iha Tinan Fiar nian.

Iha intervensaun ida ne’ebé Amu-Papa defende katak katolisizmu lori ba “buat boot” sira no konvida foin-sa’e sira atu taru sira-nia moris ba ideál boboot sira.

[Asesu omilia tomak ho lia-portugés]

 

“La iha difikulade, terus, inkomprensaun ne’ebé bele hamta’uk imi, se imi hela metin ho Maromak hanesan ai-sanak sira metin ba uvas-hun, se ita la lakon amizade ho Nia, se ita fó ba beibeik espasu ita-nia moris nian”, Amu-Papa haktuir.

Papa Francisco admite katak Kreda nia dalan no dalan pesoál sarani sira-nian “la’ós sempre fasil”, no dalabarak ita hetan difikuldade, terus.

“Tuir Na’i, husik atu nia Espíritu nakfilak ita-nia zona nakukun sira, ita-nia komportamentu sira ne’ebé la tuir Maromak no fase ita-nia salan sira, mak dalan ida ne’ebé hasoru obstákulu barak husi li’ur, iha mundu ita moris bá no iha-ne’ebé dalabarak la komprende ita, no husi laran, iha ita-nia fuan, nia fó hanoin.

Santu Padre destaka katak Maromak nia novidade mak asaun Espíritu Santu nian, ne’ebé halo buat hotu foun. Novidade ne’e, tuir Papa, la’ós hanesan inovasaun sira mundu nian, ne’ebé provizória de’it, maibé definitiva.

“Novidade ne’ebé Maromak fó ba ita-nia moris definitiva; la’ós de’it iha futuru bainhira ita hamutuk ho Nia, maibé ohin kedas”.

Francisco konvida partisipante sira iha selebrasaun atu buka halo loron ba loron “jestu domin nian” iha eskola, iha uma ka iha serbisu.

Hotu tiha omilia, Papa konfere sakramentu Konfirmasaun ba ema 44 ho tinan husi 11 to’o 55 mai husi nasaun 22, inklui Portugal, Brasil, Cabo Verde, Colombia, Irlandia, Filippinas iha sira-nia peregrinasaun durante Tinan Fiar nian hamutuk ho maluk rihun ba rihun seluk, iha loron sira dedika ba krizmandu sira.

Francisco kumprimenta ida-idak ho beiju iha hasan, hotu tiha halo sinál krús, ho mina, iha reen-toos, símbolu Espíritu Santu nian.

Ema hotu partisipa iha selebrasaun harohan ba krizmandu sira, atu Maromak gia sira iha “obediénsia radikál no haksolok ba Evanjellu”.

Hafoin iha Regeina Coeli nia entrega krizmandu sira no partisipante hotu ba Na’i-feto hodi dehan “Maria tulun imi sai matan moris ba buat ne’ebé Na’i husu ba imi, no moris no la’o nafatin tuir Espíritu Santu”.