Dili – Ohin, FMA hotu hamutuk ho Madre Jerál Ivonne iha Festa Gratidaun Mundiál ne’ebé tinan ida-ne’e selebra iha Chennai, India. [Bele haree programa iha link ne’e]. Títulu festa nian mak “Hamutuk iha Fiar ita la’o ba moris nakonu”. Tema ba festa mak: Deskobre fila fali, kuda, fó sasin no selebra don fiar nian atu ema barak nia neon no fuan loke ba moris loos.

Tinan-tinan Inspetoria be simu La Madre ba Festa ne’e, prepara dossier ida oinsá selebra festa ne’e no hato’o ba irmán Vigária-jerál, no nia mak sei haruka ba Inspetoria tomak.

 

Iha dossier ne’ebé haruka ba Inspetoria hotu, mai konvite atu

• Deskobre filafali ksolok fiar nian liuhusi dalan ida fiar nian ne’ebé envolve moris tomak (Porta fidei n. 7)
• Halakan fiar atu moris obediénsia, pobreza no kastidade iha simplisidade evanjélika (Porta fidei n. 13)
• Fó sasin kbiit transformativa fiar nian iha moris loroloron, hodi fihir metin iha Jezús Kristu, “autór fiar nian”. Nia mak lori ba realizasaun kompleta (Heb 12,2; Porta fidei n. 13)
• Iha kapasidade atu loke neon o fuan atu hakarak Maromak no moris auténtiku (Porta fidei n. 7)
• Selebra don fiar nian hodi transforma komunidade sira ho kbiit Kristu Moris-Hi’as nian ne’ebé ita hasoru iha Eukaristia loroloron nian (Porta fidei n.9).

Komunidade ida-idak husi kedas simu surat preparasaun festa nian reflete no fahe kona-ba

• Fini fiar nian kuda iha ita-nia rai- horisehik
• Dezafiu sira atu moris fiar iha komunidade no misaun – ohin
• Dalan foun evanjelizasaun nian – aban

Hafoin komunidade sira haruka ba Roma hodi tau iha website cgfmanet.org.

Ohin mós komunidade FMA tolu iha Comoro selebra hamutuk festa gratidaun ne’e ho Eukaristia iha dadeer no iha kalan ho rekreiu hamutuk iha salaun Escola Maria Auxiliadora nian.