Liturjia domingu ne’e nian aprezenta apelu ba vijilánsia. Sarani ida labele tuur metin iha komodizmu, iha pasividade, iha baruk nian, iha rotina; maibé tenke la’o, nafatin matan moris no vijilante, preparadu atu simu Na’i no hatán ba ninia dezafiu sira.

Leitura dahuluk konvida ema sira – ema hotu, husi rasa no nasaun hotu – atu hakat ba foho Na’i nia horik-fatin… Husi enkontru ho Na’i no ninia Liafuan mak sei fó fuan konkórdia nian, armonia nian, dame ne’ebé la nahas.

Leitura daruak rekomenda fiar-na’in sira atu hadeer husi dukur todan ne’ebé kesi sira ba mundu nia nakukun (mundu egoízmu nian, injustisa, bosok, salan), atu hatais an ho roman (katak Maromak nia moris ne’ebé Kristu oferese ba hotu) no atu la’o ho ksolok no esperansa, bá hasoru Jezús, bá hasoru salvasaun.

Evanjellu apela ba vijilánsia. Fiar-na’in ideál la moris iha prazér sira ne’ebé halo ita sai rahun, la husik serbsiu esesivu sofoka nia, la dukur iha pasividade ne’ebé na’ok oportunidade; fiar-na’in ideál nafatin matan moris no vijilante iha minutu hotu ne’ebé liu, hodi simu Na’i ne’ebé mai, hodi hatán ba ninia dezafiu sira, hodi kumpre ninia papél, hodi haka’as an iha konstrusaun “Reinu” nian.

Download