Sidade Vaticano (RV) –  Papa Francisco iha audiénsia jerál ohin hasoru ema lubun boot besik rihun 70 ne’ebé rona ho atensaun ninia katekeze. Tuirmai ne’e mak rezumu oan ida:

Iha Kredu, ita konfesa katak Jezús «sei filafali atu halo justisa ba ema moris no ema mate». Hanoin kona-ba Juízu finál la bele halo ita hakfodak, maibé dudu ita atu moris di’ak liu tempu prezente. Loos duni, istória umana hahú ho mane no feto nia kriasaun tuir Maromak nia lalatak no hotu ho Juízu finál ne’ebé Kristu mak hala’o. Oras-ne’e ita iha tempu intermédiu, hein nia fila-hikas ba dala rua: tempu ida  iha-ne’ebé ita tenke mantein lakan ita-nia ahi-oan fiar nian, espransa nian no karidade nian.

[Asesu kópia ho lia-portugés]

“Ohin ha’u hakarak reflete kona-ba testu evanjéliku tolu ne’ebé tulun ita atu tama iha mistéiru ne’e: testu fto-virjen na’in sanulu, talentu nian no juízu finál nian.”

Ai-kanoik dahuluk aprezenta mai ita feto-raan na’in sanulu ne’ebé hein noivu ne’ebé atu mai. Nia kle’ur no sira matan dukur. Teki-teki noivu to’o no sira prepara an atu simu nia. Maibé la’ós katak sira hotu prontu atu simu ho mina iha lámpada nune’e tanba sira ba buka sira la hasoru nia no lakon nia.

“Noivu mak Na’i no tempu hein nian mak tempu ne’ebé nia fó mai ita, ho laran-sadia no pasiénsia, molok nia fila-hika mai iha loron ikus, tempu vijilánsia nian; tempu ne’ebé ita tenke husik lakan ahi-oan fiar nian, esperansa nian no karidade nian, tempu loke fuan ba di’ak, fefurak no lialoos…”

Jezús husu mai ita atu prepara an ba hasoru nia, haree sinál sira ninia prezensa nian, atu keta dukur. No Amu-Papa subliña katak ita la dukur se ita haksolok tanba sarani sira tenke haksolok.

Iha ai-kanoik daruak, ida talentu sira nian, atan baruk-teen no konservadór prefere hakoi osan duké hakbarak nia hanesan atan na’in rua seluk halo. Ai-kanoik dehan mai ita katak tempu hein Na’i ne’ebé mai tenke sai tempu asuan nian. Amu-Papa kona-ba ne’e dirije ho modu partikulár ba foin-sa’e sira:

“Iha prasa ida-ne’e iha foin-sa’e barak. Ba imi ne’ebé iha inísiu dalan nian ha’u husu: imi hanoin ona kona-ba talentu ne’ebé Na’i haraik ba imi? Imi hanoin ona kona-ba oinsá imi bele uza sira ba servisu ema seluk nian? Imi keta hakoi talentu sira! Uza nia ba ideál boboot sira, sira ne’ebé haluan fuan, ideál sira servisu nian ne’ebé halo imi-nia talentu fó fuan. Ita la simu moris atu rai de’it ba ita, maibé fó mai ita atu ita bele fó. Foin-sa’e doben sira, imi iha belun boot ida! Keta ta’uk atu mehi buat boboot!”

Ikusnian Amu-Papa reflete kona-ba pasajen Evanjellu S. Mateus nian ne’ebé haktuir kona-ba Na’i nia fila-hikas iha loron ikus atu tesi lia ba ema moris no ema mate sira:

“Ida-ne’e dehan mai ita katak Maromak sei tesi lia mai ita kona-ba karidade, kona-ba oinsá ita hadomi ita-nia maun-alin sira, liuliu sira ne’ebé fraku no kuran liu.”

No nia taka ho hakaran ida:

“Atu Na’i, iha ita nia moris no istória nia rohan, bele rekoñese ita nu’udar atan di’ak no fiél! “