Baucau – Durante tinan tomak Kreda universál hakle’an  tema Mizerikórdia ida ne’e nu’udar pesoál no nu’udar komundade liuhusi asaun karidade no asaun espirituál nian. Nune’e ohin hamutuk ho Kreda Roma, Dioseze Baucau mós selebra enserramentu Tinan Jubileu Mizerikórdia iha solenidade Kristu Liurai nian.

Sarani sira husi parókia Sagrado Coração Vila Nova no S. António Vila Antiga selebra festa ida ne’e hamutuk ho Bispo Don Basílio, Nai-lulik  no relijiozu/a sira ne’ebe hela iha parókia rua ne’e.

Preparasaun ba festa hahú horisegik hodi reza vésperas hamutuk iha katedrál hamutuk ho Amu-Bispu Don Basilio hafoin kontinua ho vijília, adorasaun ba Santissimo no konfisaun .

Ohin selebrasaun ritu penitensiál hahú iha eskola S. Domingos Savio hodi rona leitura no omilia husi Bispu Don Basílio. Iha oomilia ne’e Don Basílio hateten katak “Ohin ita halo festa rua hamutuk; taka Jubileu Mizerikórdia nian no solenidade Kristu Liurai. Mizerikórdia fó hanoin mai ita katak Maromak prontu atu hamoos ita- nia foer ne’ebé ita halo loron-loron ka Maromak nu’udar Aman ida ne’ebé hamoos nafatin ita nia foer ne’ebé ita oferese ba Nia.

Ohin ita halo prosisaun husi ne’e to’o iha katedrál fó hanoin mai ita katak ita  ema sala-na’in ne’ebé  hakarak halo peregrinasaun ba moris rohan-laek atu ita bele ukun hamutuk ho Kristu iha  loron ikus”.

Sarani sira partisipa selebrasaun ne’e ho fervór no ho devosaun boot maski selebrasaun ne’e hahú tarde.

Buat ne’ebé importante mak, oras-ne’e ita sai maklorik no misionáriu/a mizerikórdia nian ba maluk sira, hodi ba kuru nafatin domin laran-sadia ne’e husi bee-matan Kristu nia futa Fuan Santu.

(Alice Gama)