RV – Assiste no vizita ema moras mak obra rua mizerikórdia korporál nian ne’ebé Papa Francisco hato’o iha ninia katekeze iha kuarta, 9 Novembru 2016 iha Prasa S. Pedro.

Download

Moras no ema dadur sira moris iha kondisaun ida ne’ebé limita ninia liberdade, Papa hateten, no bainhira lakon liberdade mak ita sente ninia folin boot. “Jezús haraik mai ita posibilidade atu sai livre maski ita-nia limite sira kona-ba moras no restrisaun sira. Nia oferese mai ita liberdade ne’ebé mai husi enkontru ho Nia no sentidu foun ne’ebé enkontru ne’e lori mai ita-nia kondisaun umana”, Papa Francisco afirma.

Vizita moras ida mak ai-moruk di’ak liu

Ho obra mizerikórdia sira-ne’e, Maromak konvida ba jestu ida umanidade boot nian, Papa Francisco  hateten. Iha moras, ema bele esperimenta solidaun kle’an liu no vizita ida bele sai ai-moruk di’ak liu: hamnasa ida, hamaus ida, aperta liman ida mak jestu simples, maibé importante liu ba ema ne’ebé sente mesak.

“Ita keta husik mesak ema moras sira”, Amu-Papa husu. Ba nia, ospitál sira sai ohin loron “katedrál sira terus nian”, iha-ne’ebé sai evidente liu kbiit karidade nian.

Karidade hanesan tenke hatudu ba ema dadur sira. Amu-Papa esplika katak, hodi hatama vizita ba prizaun iha obra mizerikórdia sira, Jezús konvida ema sira atu keta julga ema ida. Krime naran de’it ema dadur ida halo, Maromak kontinua hadomi nia, Papa Francisco hateten.

Iha kondisaun lakon liberdade nia oin, ema sarani simu bolun atu fó hikas dignidade ne’ebé lakon ba ema dadur. “Ema ida labele hatudu liman-fuan kontra ema seluk”, Papa Francisco hateten, hodi hatutan: “Matan-been hira mak ha’u haree iha ema dadur sira nia oin ne’ebé karik nunka tanis iha sira-nia moris, no ida-ne’e tanba de’it sira sente ema simu no hadomi sira”.