Sidade Vaticano (RV) – Hotu tiha prezide Misa ordenasaun ba amlulik foun iha dadeer domingu ne’e nian, loron 21 Abríl, iha Bazílika S. Pedro, Papa Francisco harohan Regina Coeli. Iha nia liafuan sira molok orasaun mariana, Francisco reflete kona-ba Evanjellu Bibi-Atan Di’ak nian domingu IV Páskua nian hodi dehan katak “iha versíkulu haat ne’e iha Jezús nia mensajen tomak, núkleu sentrál ninia Evanjellu: Nia bolu ita atu partisipa iha niia relasionamentu ho Aman, no ida-ne’e mak moris rohan laek”.

 

Tuir mai nia testu tomak iha lia-tetun.

«Maun no biin-alin sira,
Bondia!

Domingu dahaat Tempu Páskua nian karakteriza ho Evanjellu Bibi-Atan Di’ak ne’ebé lee tinan-tinan. Testu ohin nian hato’o mai ita Jezús nia liafuan sira-ne’e: “Ha’u nia bibi sira rona Ha’u nia lia; Ha’u hatene sira, no sira tuir Ha’u. Ha’u fó ba sira moris rohan laek. Sira la lakon, no ema ida sei la bele hadau sira housi Ha’u nia liman. Ha’u Aman, ne’ebé fó sira mai Ha’u, Nia boot liu ema hotu; no ema ida sei la bele hadau sira husi Aman nia liman. Aman ho Ha’u ida deit” (10,27-30). Iha versíkulu haat ne’e iha Jezús nia mensajen tomak, núkleu sentrál ninia Evanjellu: Nia bolu ita atu partisipa iha niia relasionamentu ho Aman, no ida-ne’e mak moris rohan laek.

Jezús hakarak estabelese ho nia belun sira relasaun ida ne’ebé sai reflesu, ho ida-ne’ebé Nia rasik iha ho Aman: relasaun ida hola-parte nian ba malu iha konfiansa tomak, iha komuñaun íntima. No atu esprime entendimentu kle’an ne’e, relasaun amizade ida-ne’e, Jezús uza ilas bibi-atan ho nia bibi sira: nia bolu sira no sira rona nia lian, hatán ba nia bolun no tuir nia. Ai-kanoik ida-ne’e furak tebes! Mistériu lian nian sujestivu duni: ita hanoin katak husi kedas ita-nia inan nia knotak ita aprende atu rekoñese nia lian no aman nia lian, iha ton lian ida nian iha-ne’ebé  ita haree domin ka desprezu, afetu ka laran-malirin. Jezús nia lian mak ida mesak! Se ita aprende atu distinge nia, Nia lori ita iha dalan moris nian, dalan ida ne’ebé hakat liu rai-kuak mate nian.

Maibé Jezús, iha pontu ida, dehan, hodi refere ba nia bibi sira: “Ha’u nia Aman ne’ebé fó bibi sira ne’e mai Ha’u…” (Jo 10, 29). Ida-ne’e importante liu, mistériu ida kle’an, la fasil atu komprende: se ha’u sente atrasaun ba Jezús, se nia lian hamanas ha’u-nia fuan, ne’e tanba Aman Maromak mak tau iha ha’u laran hakaran domin nian, lia fafurak nian… no iha buat ne’e hotu Jezús mak plenitude! Ida-ne’e tulun ita komprende mistériu vokasaun nian, liuliu sira ne’ebé simu bolun ba konsagrasaun espesiál. Dalaruma Jezús bolu ita, konvida ita atu tuir Nia, maibé akontese katak ita la konxiente katak Nia duni, hanesan akontese ho foin-sa’e Samuel. Iha foin-sa’e barak iha Prasa ne’e. Imi barak, loos ka lae? Bele haree duni… No loos duni! Iha foin-sa’e barak iha prasa ida-ne’e. Ha’u hakarak atu husu imi: dalaruma imi rona Na’i nia lian ne’ebé liuhusi hakaran ida, inkietude ida, konvida imi atu tuir nia besik liután? Imi see tilun ba nia? Imi la see tilun? Entaun… Imi iha hakaran atu sai Jezús nia apóstolu sira? Ba juventude presiza propoin ideál boboot. Imi hanoin kona-ba ne’e? Imi konkorda? Imi husu ba Jezús sá mak nia hakarak husi imi no aten barani bá! Aten barani bá! Imi husu ba Nia! Iha vokasaun ba amlulik ka vida konsagrada ida nia kotuk no molok ne’e, nafatin iha orasaun forte no maka’as husi ema ida: avó-feto ida, avó-mane ida, inan ida, aman ida, komunidade ida… Tan ne’e mak Jezús dehan: “imi harohan ba to’os na’in atu haruka to’os atan sira ba nia to’os” (Mt 9,38). Vokasaun sira moris iha orasaun no husi orasaun; no iha orasaun de’it mak bele persevera no fó fuan. Ha’u gosta destaka buat ne’e ohin, “Loron Mundiál Orasaun ba Vokasaun sira”. Ita harohan ho modu partikulár ba Amlulik foun sira Dioseze Roma nian ne’ebé ohin ha’u haksolok atu ordena sira iha dadeer ne’e. No ita husu Maria nia harohan-daet. Ohin foin-sa’e na’in 10 mak dehan “sin” ba Jezús no simu ordenasaun dadeer ne’e… Furak duni! Ita husu Maria nia harohan-daet Feto “sin” nian. Maria hateten “sin” ba moris tomak! Nia aprende atu rekoñese Jezús nia lian husi kedas nia lori Nia iha nia knotak. Maria, ita-nia inan, tulun ita koñese di’ak liután Jezús nia lian no tuir nia, atu la’o iha dalan moris nian! Obrigadu.

Obrigadu barak ba saudasaun sira, maibé imi hakilar mós Jezús. Imi hakilar “Jezús”, maka’as… Ita hotu harohan hamutuk  ba Maria».