Venilale – Ne’e mak formasaun datoluk ba familia alunos ETV sta. Maria Mazzarello Venilale tinan 2016 iha loron 5 Novembru 2016. Iha formasuan ne’e primeira parte hato’o husi padre José de Sá SDB. Padre koalia ba familia kona ba EKONOMIA FAMILIA. Familia mak instrumentu kiik ida  iha sosiedade nia laran. Wainhira familia diak sosiedade mos diak. Atu forma familia ita perzisa ekonomia ruma atu sustenta familian nia moris, nune’e familia sai metin iha domin, konfiansa, responsavel no la hamosu hahalok oi-oin ne’ebé bele estraga familia. Objetivu seluk mak oinsa inan no aman sira hatene jere osan ba oan sira nia moris, hanesan estuda, persiza nst. Iha mos ezemplu barak ba inan no aman sira atu tetu didiak  sira nia ekonomia nune’e bele uza ho responsabilidade ba oan sira nia diak.

Iha segunda parte Sr. Virgilia apresenta kona ba kontinuasaun dokumentu Papa Franciscu nian kona ba “Amoris Letitiae”. Sublina pontus importantes hanesan Transmisaun moris nian no haboot domin ba oan sira, tanba Maromak hakiak mane no feto atu prokriasaun, nune’e ho responsabilidade hodi transmite moris no oan iha tanba domin. Valores umanu mak aas liu, nune’e ita la iha direito atu hasae bebe nebe iha inan nia knotak (abortu). Mate natural- trata ema ho agresivu ka euthanasia, la bele mos oho ema ho lei ida (Death penalty), Relasaun libre . pontu seluk kona ba familia no kreda. Kreda haksolok teb-tebes ho familia sira nebe to’o ohin loron moris tuir kreda nia hanorin sira. Familia sira nebe diak mak kreda ninia forsa. Hatene perdua malu, haksolok hamutuk, suporta malu.

Domin kaben nian iha moris lor-loron

• Domin pasensia (tahan buat hotu)
• Domin laran luak ( prontu serve no tulun)
• Domin la laran moras (hare ema seluk nia ksolok laos cemburu arbiru)
• Domin la loko-an ( la hanoin resin kona ba nia an maibe hanoin kona ba ema seluk)
• Domin la buka oin–la kasar (midar, delikadeza)
• Domin laran luak ( fo domin duke hein domin)
• Domin la buka nia rasik nia diak
• Domin perdua (treina ita nia fuan atu hatene perdua ita nia an no ema seluk)
• Domin haksolok ho ema seluk ( hare ema seluk susesu)
• Domin tahan buat hotu ( la koalia aat ema seluk, hasoru buat aat ho diak)
• Domin fiar buat hotu ( konfidensia no laran metin ba ema seluk
• Domin iha esperansa ba buat hotu ( oan sira sei sai diak, sei hetan moris foun)
• Boot iha domin konjugal ( afective uniaun, spiritual no sakrifisiu)
• Domin fahe iha moris tomak( ksolok, susar no terus)

 Husi parte saude nian  Sr. Yasintha apresenta uitoan kona ba problema sira ne’ebé oras ne’e foinsa’e sira hasoru iha ita nia rain hanesan Abortu, Droga no seluk tan. no Métodu Natural ne’ebé igreja apoiu ho nia finalidade hanesan : Atu la hetan oan no fo espasu ba oan, atu hetan oan ba kazal sira susar hetan oan, Halo planu ba hetan oan mane ka feto Hadook kontaminasaun material kimika/alat kontrasepsaun husi inan feton nia isin, Hakiak komprensaun, respeitu, fidelidade, responsabilidade, komunikasaun no lori ksolok entre fen no laen hodi moris diak iha familia maibe la konkorda ho alat  kontrasepsaun sira. Iha formasuan ne’e familia sira partisipa ho entuziasmu tebes hadi hato’o sira nia idea, perguntas no mos sugestaun sir aba tinan ne’ebe sei mai.

(Yashinta Hoar)