Dili – Irmán FMA sira grupu idade média hamutuk na’in 18, ohin loron 20 Abríl,  halo sira-nia enkontru formasaun. Sira-nia tema reflesaun kona-ba maturidade iha identidade feminina relijioza saleziana. Molok enkontru, irmán sira reflete ona pesoalmente kona-ba elaborasaun persesaun adekuada identidade feminina rasik no aseitasaun emotiva an rasik nian, husi livru ida irmán Milena Stevani fma nian “Per una autonomia affetiva”.

Enkontru hala’o  ho modalidade semináriu, iha-ne’ebé irmán ida-idak kontribui no fahe nininia esperiénsia rasik, hahú ho momentu orasaun iha-ne’ebé irmán sira hetan konvite atu agradese no valoriza Maromak ba don sira-nia an rasik nian no identifika aspetu ne’ebé presiza halo buras liután hodi husu Maromak nia tulun.

Enkontru fahe ba parte rua: parte uluk reflete kona-ba imajen pozitiva no negativa  feto nian iha kontestu ohin nian no ida-ne’ebé ida-idak asimila. Iha-ne’e sira haree pedasu ruma filme nian ne’ebé aprezenta modelu oioin feto nian hodi deskobre sá de’it atitude pozitiva no negativa sira ne’ebé feto iha. Parte daruak, hodi konfronta projetu formativu, irmán sira konstroi perfíl feto konsagrada saleziana. Hodi foti versíkulu ruma husi salmu  84 “atu tuir nia dalan buras iha kbiit”, sira elabora perfíl FMA iha idade ida-ne’e.

Rahun di’ak ba sira ne’ebé hetan sira-nia kbiit iha Ita, sira ne’ebé rai hela iha fuan dalan sira ne’ebé lori ba Ita-nia fatin santu:

Ita nu’udar FMA feto konsagrada halo Maromak nia liafuan sai ita-nia orasaun moris no proklamasaun hodi fó kualidade ba tempu orasaun nian.

Moris ho esensiál no husik Maromak sai sentru ba ita-nia moris.

Bainhira liu husi foho leet maran, sira muda nia ba rai buras ho bee:

Konxiente ba limitasaun sira no simu ho realizmu no hakmatek ita-nia realidade.

Ba kle’an liután ba ita-nia kondisaun sira no hafoun beibeik ita-nia motivasaun vokasionál sira

Sira la’o ho laran manas ne’ebé sai boot daudaun:

Atensaun ba relasaun interpesoál ne’ebé kle’an hodi haburas aspetu inan nian, sai don ba ema seluk, prontu atu simu, valoriza malu, laran metin ba malu, perdua malu.

Inkarna karizma iha ita-nia moris pesoál, komunitáriu no iha misaun edukativa; hetan ksolok atu envolve iha Institutu nia misaun.