Husi irmán Cecilia fma
no novísia FMA sira

Dili – Formande sira husi kursu interkongregasionál hala’o semináriu loron tomak, ohin 19 Abríl, fahe ba grupu rua: Novísiu/a tinan dahuluk no novísiu/a tinan daruak. Fatin semináriu nian mak Comoro iha Novisiadu FMA no iha komunidade Divina Providénsia.

 

Grupu novísia/u sira  tinan dahuluk nian kona-ba “Doutrina Sosiál Kreda nian”. Palestrante mak padre Gabriel Suban Koten SVD no partisipante sira hamutuk na’in 40. Iha semináriu ne’e padre aprezenta uluk kona-ba istória oinsá hahú doutrina sosiál Kreda nian iha Papa  Leaun XIII nia tempu. Fundu istóriku mak ideolojia rua sosializmu no kapitalizmu. Ho nia ensíklika Rerum Novarum (1891), Amu-Papa Leaun hakarak hatudu Kreda nia pozisaun hasoru realidade esplorasaun ema nian, liuliu ba traballadór sira nia kondisaun dezumanu no opresaun nian. Ho ensíklika ne’e Amu-Papa dehan katak Kreda la haklaken de’it Kristu maibé haree mós kona-ba moris sosiál. Amu-Papa Leaun XIII husu sarani sira atu dezenvolve no kria situasaun foun ne’ebé justu tuir espíritu Evanjellu nian. Husi Papa Leaun XIII, Papa seluk mós kontinua renova nafatin ensíklika sira no  hahú halo pasu foun iha Kreda  nia relasaun ho mundu modernu. Igreja husu nafatin ba Governu  atu fó importánsia ba traballadór sira hodi trata sira nu’udar ema ne’ebé iha dignidade no selu sira tuir lei ne’ebé iha.

 

Grupu novísia/u tinan daruak nia semináriu kona-ba “dixernimentu” ho partisipante hamutuk na’in 13. Padre Krisna Aji Nugroho Ocarm mak dirije semináriu ne’e. Nia hateten katak dixernimentu signifika ta’es, tetu didi’ak no hatene halo distinsaun entre espíritu di’ak no espíritu aat. Prinsípiu dixernimentu nian mak domin no perdaun. Atu hili presiza haree motivasaun no ninia objetivu. Tuir padre Krisna, kritériu ba dixernimentu mak tenke sai livre husi an rasik, loke an ba Maromak nia bolun no sakrifika an atu tuir lala’ok vokasaun nian. Nia mós dehan katak atu halo ne’e presiza haree, tetu no foti desizaun hodi sai fiél ba desizaun ne’e ih luta loroloron nian.  Iha fatór tolu ne’ebé influensia dixernimentu: an rasik, espíritu di’ak no espíritu aat. Ita ema la ekilíbriu no iha influénsia husi espíritu di’ak no aat; se ita hili atu tuir espíritu di’ak ita-nia moris sai kontente, haksolok no hakmatek; kontráriu ho espíritu aat ita la hakmatek, la livre no la iha dame iha ita nia interioridade, tan ne’e presiza treinu beibeik atu hili buat ne’ebé di’ak iha ita-nia moris maski buat ki’ik liu. Nune’e lori ita atu halo tuir Maromak nia hakaran.