Liturjia domingu ne’e nian konvida ita atu kontempla Maromak nia domin. Nia aprezenta Maromak ida ne’ebé hadomi nia oan hodi la esklui ema ida, inklui ema maksalak sira, ema aat, ema marjinál sira, ema “foer” sira; no hatudu oinsá domin de’it mak bele transforma no hamoris ema.

Iha leitura dahuluk “matenek-na’in” ida Israel nian esplika “moderasaun” ne’ebé Maromak uza hodi trata opresor Ejitu nian. Moderasaun ne’e hatudu lójika ida domin nian: Maromak kbiit-na’in ne’e, ne’ebé hakiak buat hotu, hadomi hanesan aman ida kriatura hotu sai husi nia liman maski ema sira-ne’e mak  opresór sira, maski sira mak Ejitu nia oan sira, basá hotu-hotu mak nia oan.

Evanjellu aprezenta istória ema maksalak ida nian, marjinalizadu no desprezadu husi ninia maluk sira, ne’ebé deskobre Jezús no haree iha Nia Maromak domin-na’in nia oin… Simu tiha konvite ba meza “Reinu” nian, ema egoísta no aat ne’e husi atu Maromak nia domin transforma nia no sai ema laran-luak ida, ho kbiit atu fahe ninia soin sira no laran sadia ba ema kiak sira.

Leitura daruak halo referénsia ba Maromak nia domin, hodi releva ninia papél iha ema nia salvasaun (husi Nia mak mai bolun dahuluk ba salvasaun; Nia akompaña ho domin ema nia dalan loroloron nian; Nia haraik ba ema iha moris nia rohan moris nakonu)… Aleinde ne’e, nia aviza fiar-na’in sira atu keta husik fantazia fanátiku sira-nian manipula sira, atu atrapalla ema sarani normál nia dalan.

Download