Dili – 22/10/2016 Maun Alberto Piedade fó formasaun ba ami Irmán juniora sira hamutuk 21. Fatin Novisiado São José – Comoro. Tema ba loron ne’e mak “Koñese-an di’ak liután”. Basá koñese ita nia-an rasik mak inísiu ida ba sabedoria rasik. Molok tama kle’an ba tema ne’e nia hahú ho tipu haat relasaun interpesoál nian ne’ebé dehan; koñese liu de’it nu’udar okaziaun, relasaun bazeia ba papél (knaar) mós nu’udar okaziaun, amizade (fiar/konfiansa) tuir períodu no íntima (emosaun ho sentimentu). Entre sira ne’e  ida ne’ebé importante liu mak fila fali ba an rasik.

Maun Alberto mós tulun ami oinsá atu halo diferensa kona-ba liafuan intelijénsia no sabedoria. Nia dehan  ema ida-idak tenke balansu iha hanoin no emosaun tanba ho ne’e de’it mak bele iha klareza ba dezisaun sira.

Tuir mai iha Aspetu Importante Lima (5) ne’ebé bele tulun ami ida-idak atu haree ami-an iha laran:

1.   PERSONALIDADE: Kompriende kona-ba ita-nia-an, Ita ne’e sé ba ita-nia an rasik? no mós bainhira iha públiku? Observasaun kona-ba ita-nia an hahú husi LARAN to’o LI’UR

Karákter (Personalidade): Kualidade mentál no morál ne’ebé halo ema iha diferensa ho ema seluk ;

Atitude: Maneira hanoin/perspetiva ne’ebé reflete iha hahalok/reasaun ba buat ida;

Hahalok: Maneira ida ne’ebé ema lori/hatudu/halo asaun ruma ba ema seluk;

Iha fraze ida ne’e nia hakarak atu lori  ami ida-idak  fila fali ba ami nia períodu kiik oan nian tanba bele dehan katak ha’u ne’ebé agora forma husi uma-laran, sosiál no komunidade.

Hafoin iha mós  pergunta ne’ebé bazeia ba testu hodi husu ba-an: Ha’u ne’e sé?  Ha’u-nia karakter ne’e oinsa?Ha’u ne’e se bainhira ho kolega sira? Ha’u-nia reasaun bainhira hasoru ema foun? ‘Persona’ saida mak ha’u hatudu bainhira hasoru ema ne’ebé ita seidauk koñese? Ha’u nia hahalok ne’e oinsá bainhira ita kontente no triste?

Nia halo mós akividade ida ba ami, halo ami ida-idak  haree-an iha TIPU PERSONALIDADE nian ne’ebé nia sita ona iha ne’e mak:    

INTERASAUN

• Extroversu: Enerjia mai husi ema, kontente atu halo atividade oi-oin, book-an moris, no bele multitasking
• Introversu: Gosta serbisu mesak no iha grupu ki’ik, prefere serbisu neineik no halo serbisu ida-idak

HALO DESIZAUN

• ‘Thinkers’: Uza lójika bainhira halo desizaun, tetu di’ak no ladi’ak, apresia onestidade, konsisténsia no justisa, igualdade no ekuidade .
• ‘Feelers’: Sensitivu no kooperativu, deside bazeia ba valór pesoál/privadu no oinsá mak ema seluk sei hetan ninia impaktu husi sira-nia asaun

ABSORBE INFORMASAUN

• ‘Sensors’: Ema ne’ebé realista (faktu no detalle sira), uza ‘common sense’ no esperiénsia husi pasadu atu bele fó solusaun ba problema
• ‘Intuitives’: Prefere fokus ba posibilidade no jeneralidade eh “big picture”, gosta haree ba ezemplu seluk, apresia inovasaun, no buka solusaun kriativa ba problema.

BAINHIRA ORGANIZA

• ‘Judgers’: Organizadu no preparadu, gosta halo tuir planu, konfortavel atu halo tuir regulamentu sira.
• ‘Perceivers’: Prefere atu iha opsaun barak, gosta halo buat ida ho spontan, no gosta flexibilidade bainhira halo planu.

2. VALÓR MORIS NIAN: Kódigu Morál

Prinsípiu sira ne’ebé mak afeita ba ema ida nia moris bainhira halo desizaun, atu influensia ema seluk, rezolve problema no komunikasaun iha moris loron-loron nian. Liuliu oinsá atu moris iha onestidade, integridade, seguransa, flexibilidade, dedika-an ba ema seluk,  sabedoria, lealdade, responsabilidade simplisidade no serbisu hamutuk.

3. HA’U-NIA AN

Ha’u tenke hatene didi’ak ha’u-nia an, oinsá ho ha’u-nia dada-iis. Abilidade saida de’it mak ha’u iha? Ha’u nia limitasaun mak saida de’it? Ha’u iha ekuilíbriu/balansu no flexibilidade ka lae? Ha’u presiza mós dehan ba ha’u-nia an atu halo buat ida “maibe ha’u duvida. Saida mak ida ne’e halo mai ha’u? Koko “CHALLENGE” an to’ok ho buat ruma – FIAR AN!

4. HA’U-NIA MEHI/AMBISAUN: Ambisaun ka mehi ba futuru ; ajuda atu bele kria dalan/pasu ba oin. Bainhira la fiar sei nunka atinje ; kompriende didi’ak ita-nia mehi. Ita sei to’o. Nune’e haka’as an halo mehi ida ne’e sai hanesan buat ida ne’ebe ita investe loron-loron atu bele to’o iha ne’ebá! Serbisu makaas atu bele to’o iha ne’ebá no APRESIA & FÓ INSENTIVU BA AN RASIK! Basá Formasaun kontínua …

5. SAIDA MAK HA’U GOSTA NO LA GOSTA:

ATIVIDADE ami ida-idak “Hakerek buat 5 ne’ebe ami gosta no la gosta”! Onestu ho ami-nia an rasik presiza korajen. Parte ikus nian ami hotu ho fuan gratidaun nian hakarak agradese ba Maun Abetu ne’ebé ho laran luak fahe ona ninia tempu no matenek ho ami. Maromak fó bensaun no Nia sei fó konta iha loron ikus.

Tema ikus nian ida ne’e bele fó mai ami klareza kona-ba oinsá mak bele konfia-an no sente konfortavel ho ami-nia an rasik – barak la hatene no sente ida ne’e.

(Agata Freitas)