Loron Mundiál Orasaun nian ba Vokasaun sira

Maski agora ita iha Papa Francisco, mensajen ba Loron Mundiál Vokasaun 2013 nian Papa Bento XVI (agora eméritu) mak hakerek ho data 6 Outubru 2012. Iha mensajen ne’e, Bento konvida atu reflete kona-ba tema: «Vokasaun, sinál esperansa nian ho fundamentu iha fiar», ne’ebé integra iha Tinan Fiar nian no tinan limanulu abertura Konsíliu Vaticano II nian.

[Asesu kópia “Mensajen” ho lia-indonézia]

 

Bento XVI destaka katak ba tinan limanulu nia laran ona mak komunidade ekleziál namkari iha mundu tomak hamutuk espiritualmente tinan-tinan iha Domingu IV Páskua nian, atu harohan husi Maromak don vokasaun santa nian no propoin ba ema hotu nia reflesaun urjénsia atu hatán ba Maromak nia bolun.

“Bainhira Jezús nia eskolante ida aseita Maromak nia bolun atu dedika an ba saserdósiu ka ba vida konsagrada, –Bento XVI hateten,- nia manifesta rezultadu/fuan tasak husi komunidade sarani, ne’ebé tulun atu hateke ho konfiansa boot no esperansa ba Kreda nia futuru no ninia kompromisu ho evanjelizasaun”.

Mensajen fó enfáze ba importánsia orasaun nian ba vokasaun sira, hodi esplika katak vokasaun “moris husi esperiénsia enkontru pesoál ho Kristu, diálogu sinseru no konfiansa nian ho Nia, atu tama iha ninia hakaran. Tanba ne’e presiza buras iha esperiénsia fiar nian, haree nu’udar relasaun kle’an ho Jezús, nu’udar raronak interiór ba nia lian ne’ebé halian iha ita-nia laran”.

Loron domingu 21 Abríl, dedika ba Loron Mundiál Orasaun nian ba Vokasaun sira, iha Roma,  Amu-Papa Francisco sei ordena amlulik foun na’in sanulu ba dioseze Roma nian: italianu na’in neen, indianu na’in rua, arjentinu ida no kroatu ida. Misa sei hahú iha tuku 9.30 oras Roma iha Vaticano.