Fó han no fó hemu ba ema ne’ebé hamlaha no hamrook
RV – Iha audiénsia jerál 19 Outubru, Papa Francisco reflete kona-ba obra rua mizerikórdia nian: “fó han no fó hemu ba ema ne’ebé hamlaha no hamrook.
Amu-Papa alerta perigu egoízmu nian prezente iha modelu sira “cultura do bem-estar” nian ne’ebé “lori ema atu takaiha an rasik, hodi sai insensivel ba ema seluk nia ezijénsia sira”. Maibé pobreza ne’e buat ida reál, konkreta no ba ne’e ita presiza enfrenta sira. NUne’e mak entre obra sira mizerikórdia nian ita iha ida fó han ba ema hamlaha, fó hemu ba ema hamrook.
“Pobreza abstrata la interpela ita. Halo ita hanoin”. Maibé bainhira ó haree pobreza iha mane ida, feto ida, labarik ida nia isin, ida-ne’e ‘sim’ interpela ita. No tanba ne’e, toman ida atu halai – halai husi ema ne’ebé presiza, atu la hakbesik, ne’e la di’ak, hadook ita husi realidde.
Papa Francisco husu ba ema lubun-boot, bainhira ha’u hasoru ema ida ho nesesidade, “Sá loos ha’u-nia reasaun? Desvia ha’u nia hateken no la’o liu de’it? Eh ha’u para atu ko’alia no iha interese ba ninia istória?”
Atu hetan paun loroloron nian mak buat ida susar ba ema barak wain. Tanba ne’e mak kompromisu atu hala’o obra rua mizerikórdia nian temi iha leten mak ita hotu nia kompromisu.
“Esperiénsia hamlaha ne’e todan. Ema ne’ebé moris períodu funu no karestia nian hatene buat ne’e. No maski nune’e esperiénsia ida-ne’e sei repete loroloron no ita haree konvive iha abundánsia no desperdísiu nia sorin”.
