Retiru anuál inspetora FMA Ázia-Pasífiku sira-nian

Sam Phran (Tailándia) – Ohin remata retiru Inspetora sira Konferénsia Interispetoriál CIAO, PCI no SPR iha Sam Phran, Thailandia ne’ebé hahú loron 12 outubru ho Madre jerál nia prezensa. Partisipa ba retiru ida ne’e, superiora na’in 6 husi India, na’in 9 husi Sud Est Asia no superiora ida husi Australia no Oseania.

Dader-dader, Madre Yvonne propoin ninia reflesaun kona-ba Mizerikórdia (Accompagnate dalla misericordia… per essere missionarie di speranza e di gioia) no iha enkontru ida-idak nia konsidera aspetu ruma ‘fuan” nian, tanba mizerikórdia iha nia hun no buras iha ema ida-idak nia fuan. Maski ita besik ona remata Tinan Mizerikórdia nian, Madre Yvonne hakarak reflete kona-ba atitude ida ne’e tanba tinan Jubileu bele remata, maibé laran sadi’a sei la remata: tuir Amo Papa Francisco nia liafuan, “laran sadi’a mak Maromak nia naran loos”. Nune’e, Madre Yvonne ko’alia kona-ba fuan namoradu ida, fuan inan nian, fuan fiel, fuan ne’ebé akompaña, fuan ne’ebé moris no transmite ksolok vokasionál, fuan rekonsiliadu no nakonu ho ternura, fuan marianu no misionariu. Topiku ida-idak interpela ami-nia estilu animasaun nian no moris pastorál iha Inspetoria.

Depois de konferénsia, Madre Jerál sai disponivel ba kolokiu ho superiora sira, no ami iha loron tomak atu reflete, reza, hateke ba ami-nia moris no Inspetoria nian.

Kalan-kalan, Madre Yvonne hato’o dala ida tan ninia liafuan hodi refere ba liturjia loron tuir mai nian ne’ebé loron hirak ne’e riku tebes: Beata Alexandrina da Costa, S. Teresa d’Avila, S. Ignazio, S. Lukas… no ida-idak iha lia-menon ruma ba ami-nia moris. Kalan mak momentu atu haktuir mós “notisia família nian” kona-ba moris iha Institutu: vokasaun sira iha Institutu, Madre Jerál nia viajen, akontesimentu parikular iha Inspetoria ruma.

Loron 17 ami selebra loron penitensiál no loraik iha posibilidade atu halo peregrinasaun to’o Porta Santa ida besik irmán sira nia uma no manán induljénsia. Iha santuariu, ne’ebé dedika ba Beatu Nicolas Bonkerd Kitbamrung, amlulik tailandes ne’ebé martir, ami iha oportunidade atu reflete kona-ba sasin ba Kristu, ne’ebé konvida sarani hotu atu tuir ninia dalan Kruz nian.

Ohin meiudia, ami remata retiru ho Missa: molok hahú irmán ida-idak lori fuan ki’ik oan ida ho atitude ne’ebé nia presiza haburas liután iha fuan boot ida ne’ebé tau iha altar oin. Nu’udar liafuan finál, hodi foti inspirasaun husi buat ne’ebé Amo Papa Pio IX hato’o ba irmán sira espedisaun misionaria nian, Madre Jerál dehan: “Imi sai hanesan fontana ne’ebé sei la maran tanba iha ligasaun ho Bee-matan Domin no Laran Sadi’a nian, iha ne’ebé imi rasik ba hemu”.

Loraik ami sei kontinua “diálogu” hamutuk ho Madre Yvonne no Inspetora hotu ba loron rua, atu Madre bele hato’o ba ami hotu komunikasaun no informasaun ruma; hafoin loron 22 no 23, hamutuk ho delegada husi Inspetoria sira ne’ebé halo parte CIAO, ami sei kontinua ho konferénsia CIAO, no ho eleisaun Presidente foun CIAO nian.

(Alma Castagna, Inspetora FMATIN)