Quelicai – Movimentu Juvinil Salesiano ( M.J.S) nu’udar movimentu bo’ot ida ne’ebe bain-hala’o iha komunidade sira Salesiano no Salesiana sira nian hodi halibur animadores no foinsa’e sira husi grupo oin-oin ne’ebe hala’o misaun hamutuk iha espiritualidade ida deit, espiritualidade Salesiana nian. Iha forum ida ne’e, enkaregada husi pastoral hamutuk ho foinsa’e animadores no foinsa’e husi grupo oin-oin ne’ebe eziste iha ambiente salesiana, buka atu fahe ba malu esperiensia misaun nian ne’ebe hala’o ona durante tinan ida nia laran liu husi halo avaliasaun hamutuk hafoin buka atu halo empenu ka propozitu foun ba tinan oin mai.

Iha tinan ida ne’e forum M.J.S. realiza iha komunidade Salesiano Quelicai, hahu husi loron 7-9 Outubru. Partesipante foinsa’e sira husi grupos no animadore sira hamutuk nai’n 370, irman sira hamutuk nain 15, irmão ou frater sira hamutuk nain 20 no  mós  iha formande sira. Objetivu husi forum M.J.S ba tinan ida ne’e mak atu halo peregrinasaun hamutuk  ba iha kristu Rei Matebian, molok taka jubileu Mizerikordia nian ne’ebe amo Papa dedika iha tinan ida ne’e. Tema ba forum MJS ba tinan ida ne’e mak: “Ksolok   ba sira ne’ebé laran luak basá sira sei hetan laran luak….” (Mat. 5: 7)  ho tópiku ida ne’e tulun foinsa’e sira atu reflete kona-ba Maromak nia laran sadia no koko atu sai laran sadia hanesan Maromak ne’ebe laran sadia.

 Iha bona notte madre Alma Castagna Fma, kumprimenta foinsae sira hodi fo parabens tanba bele selebra festa iha foho Matebian. Ho ida neé nia husik hela mensajen husi salmu: “Ema neébe sae Maromak nia foho mak ema  ne’ebé laran moos no liman moos”.

Forum M.J.S ne’ebe hala’o durante loron tolu nia laran hahu ho Misa abertura ne’ebe dirije husi Pe. Mario Do Rozario iha nia homilia nia bolu foinsa’e sira nia atensaun atu hanesan Maria simu Maromak nia Liafuan hodi moris tuir, depoizde misa, jantar hamutuk hafoin Pe. Rolando fo konferensia ida hodi aprezenta kona-ba obra miserikordia “corporal no espiritual.” No mós miserikordia iha Santu/a Saleziano sira nia moris. Iha loron 1⁰ hahu ho orasaun dadeer hamutuk hafoin ba misa. Misa hotu tiha, hotu-hotu hola matabisu. Depoizde matabisu foinsa’e sira  halibur hamutuk fali hodi fahe ba malu komprromisu  / empeñu ne’ebe foin-sa’e sira husi grupo no oratorio ida-idak hala’o iha ida-idak nia oratorio ka iha nia grupu.  Aprezenta hotu tiha kompromisu ne’ebe hala’o durante tinan ida nia laran, kontinua ho konferensia  ne’ebe fó usi Pe. Mario Souzs, SDB ko’alia kona-ba (sakramentu rekonsiliasaun mak porta mizerikordia nian). Konferensia  2⁰ ne’ebe prega husi Me. Floriana Aparicio kona ba Lectio Divina,  grupu ida-idak ba haklean testu kona ba Filho Prodigo nian no hamutuk ho grupu neé halo  empeñu pesoál konaba hahalok mizerikordia nian neébé atu moris tuir. Hotu tiha,  konferensia animadores husi oratorio ida-idak halibur hamutuk fali empeñu foun ba tinan oin mai.

Ho entusiasmo no ho ksolok, foinsa’e sira  hala’o atividade M.J.S nian hodi selebra hamutuk jubileu miserikordia nian hodi halo peregrinasaun hamutuk ba foho Matebian. Durante hala’o peregrinasaun ba foho Matebian, foinsa’e sira hatudu sira nia entusiasmo laran manas no iha espiritu ne’ebe forte atu hala’o peregrinasaun ida ne’e maske hasoru difikuldade  oin-oin iha dalan. Peregrinasaun ne’e hahú husi oras tuku 21: 45 no to’o iha foho Matebian ho oras tuku 06:30. Hodi haree ba distansia foho ne’ebe aas, la halakon foinsa’e sira nia entusiasmo atu to’o iha fatin ne’ebe sira hein no hakarak to’o. Iha tuku 10 misa enserramentu prezide husi pe. Transfiguracao, nuúdar vigáriu provinsiál  Salezianu ba Indonezia-Timor. Iha omilia padre hateten katak “liafuan agradese importante liu iha ita nia moris. Tan neé ohin ita mai halibur hamutuk iha fatin neé atu agradese  Maromak tan nia akompaña ita iha ita nia viajen to’o iha foho Matebian. Foho iha Biblia dehan katak fatin lulik no fatin Maromak nian basá besik liu Maromak.  Agradese Maromak basá Ninia laran luak laiha rohan.”

Hotu tiha misa fila-fali kedas ba Quelicai atu han meudia no agradese ba komunidade Quelicai hamutuk ho komisaun sira. Hafoin idak-idak ba fali ninia hela fatin.

(Alice Gama)