RV – Obra mizerikórdia sira mak ‘antídoto’ di’ak liu ba vírus indiferensa nian: ne’e mak buat ne’ebé Papa Francisco hateten ba sarani rihun ba rihun halibur iha Prasa S. Pedro ba Audiénsia Jerál kuarta, 12 Outubru.

Papa fó sai katak iha semana oin mai nia sei dedika nina katekeze ba “obra mizerikórdia sira – 7 kona-ba isin no hitu kona-ba espíritu – ne’ebé Igreja aprezenta mai ita nu’udar modu konkretu atu moris mizerikórdia. Jezús hatudu mai ita dalan simples, halo ho jestu ki’ik-oan sira, maibé ho valór boot iha NInia matan sira, no husi ne’e mak ita sei hetan julgamentu.

Hahalok atu tulun ema nia nesesidade materiál sira hanaran obra korporál sira: fó han, fó hemu, fó hatais, fó um aba la’o-rai sira, asiste ema moras, vizita ema dadur sira, hakoi mate.

Maibé iha mós obra mizerikórdia espirituál hitu: fó konsellu di’ak, hanorin ema ignorante sira, korrije ema ne’ebé halo salam konsola ema laran-triste, perdua ema halo aat ita, suporta ho pasiénsia ita-nia maluk nia frakeza sira, harohan ba ema morsi no matebian sira.

Obra simples maibé urjente

“Iha mundu ida ne’ebé infelizmente kanek tanba vírus indiferensa nian, obra mizerikórdia nian mak ‘antídoto’ di’ak liu. Defaktu, nia eduka ita ba atensaun ba ezijénsia sira elementár liu ita-nia maun-alin sira ne’ebé fraku liu nia ezijénsia sira elementár liu, ne’ebé iha sira”.

Dalabarak ita distraidu, indiferente, no bainhira Na’I liu besik ita, ita lakon okaziaun atu hasoru Nia, Amu-Papa hatutan. Obra mizerikórdia sira hafanu iha iha ita ezijénsia no kapasidade atu halo ita-nia fiar sai operoza ho karidade.

“Ha’u konvensidu katak ho jestu simples loroloron nian ita bele realiza revolusaun kulturál ida loos nian. Se ita ida-idak halo pelumenus obra mizerikórdia ida loroloron, ita sei iha revolusaun ida!”

Papa Francisco temi Santa Teresa de Calcutá nia ezemplu, ne’ebé ema la hanoin ba uma barak nia loke ih amundu, maibé tanba nia hakruuk ba ema ida-idak ne’ebé nia hetan abandona hela iha lurón klaran atu fó hikas dignidade.

“Atu Espíritu Santu halakan iha ita hakaran atu moris ho estilu moris nian ida-ne’e. Pelumenus obra ida loron ida. Mai ita aprende dekór filfali obra mizerikórdia korporál no espirituál sira no husu Na’i atu tulun ita tau iha prátika loron-loron. Ne’e mak momentu ita haree Jezús iha ema ida ne’ebé iha nesesidade”.