Editoriál: Mizerikórdia mak Maromak nia fuan

“Mizerikórdia mak liafuan ne’ebé revela mistériu Santíssima Trindade nian. Mizeri­kórdia mak hahalok ikus no aas liu iha-ne’ebé Maromak mai hasoru ita. Mizeri­kórdia mak dalan ne’ebé tau hamutuk Maromak no ema, tanba loke fuan ba es­peransa katak Maromak nafatin hadomi ita maski ita iha limite salan nian. Mizerikórdia mak lei fundamentál ne’ebé horik iha ema ida-idak nia fuan bainhira hateke ho matan sinseru maluk ne’ebé nia hasoru iha dalan moris nian” (Misericordiae Vultus, 2).

Husi Maromak nia mizerikórdia mak pos­sivel mós atu ema iha mizerikórdia se karik nia hakbesik ba bee-matan ida-ne’e, tuir Jezús nia liafuan rasik: “Imi sai mizerikor­diozu hanesan imi-nia Aman mizerikordio­zu” (Lc 6, 36). Tanba ne’e ema ne’ebé sai laran-sadia, ema ne’e hatene katak nia simu husi Maromak mizerikórdia boot, aprende husi nia atu sai laran-sadia no husik mizeri­kórdia kuda abut kle’an iha ninia fuan, halo sai ninian atitude ida-ne’e. Ita simu nu’udar prezente don ne’e no ita fó fali nu’udar don ba ema seluk. Ita simu domin wain husi Ma­romak, ita mós hadomi wain maluk sira.

Iha Tinan Santu ne’e, Kreda hakarak sai inan ba nia oan sira ne’ebé monu, fraku, kanek tanba salan nia efeitu sira. Kreda halo ida-ne’e hodi loke odamatan mizeri­kórdia nian atu ita bele manán induljénsia; Kreda aprezenta Maria Santíssima nu’udar Inan mizerikórdia nian hanesan ita invoka iha Salve Regina; Kreda aprezenta modelu oioin santidade nian ne’ebé halo mizerikór­dia sira-nia mata-dalan ba lalehan, hanesan Madre Teresa de Calcutá.

Ita husu mai ita-nia an se iha Tempu Santu ne’e nia laran ita nia fuan sai hanesan Ma­romak nian, fuan ne’ebé mizerikordiozu?