Dili – Ohin loron ikus (30 Setembru 2016), Fulan ne’ebe santa kreda dedika ba Maromak nia futar lia ne’e sai eventu forte atu hametin ita nia nia fiar iha Maromak nia futar liafuan. Iha okaziaun ida ne’e mak  Irman FMA sira husi komunidade Don Bosco Balide organiza kampu Biblia ho tema “ Maromak nia Futar liafuan fo roman ba hau nia moris” ba foinsae  sira ne’ebe hola parte iha  Paroki Balide,kuaze 250 mai husi: Eskola 04 Setembru, Eskola Nobel da Paz, eskola São Jose Operario, Eskola Kristal no mos inklui foinsae sira ne’ebe hola parte iha grupu kategoriais sira iha Parokia nia laran no mos Irmas sira husi kongregasaun Canosiana Balide no Kongregasaun SPC.

Liafuan abertura ba kampu Biblia,husi  Reprezentante Nuncio iha Timor Leste, Mons. Mario Codamo ,  ne’ebe mai fahe liafuan diak ba partisipante sira hodi koalia kona ba importansia Biblia iha moris sarani   ohin loron.  Biblia katak liafuan domin nian ne’ebe mai husi Maromak ba ita ema atu hetan salvasaun. Ne’e hanorin mai ita katak nudar ema kristaun presiza hatene no kuñese klean kona ba Maromak nia futar lia. Mons Mario mos hatutan katak Biblia hanesan toos ida ne’ebe ita sarani presiza atu explora nune’e bele hetan rikusoin kona ba Maromak nia mensajen iha nia laran. Tanba iha Antigu no Novo Testamentu livru hamutuk 73 livru. Iha  Antigu Testamentu iha livru 46; iha nia laran iha livru lei , livru historia, livru sapiensia e livru profeta. Iha Novo Testamentu livru hamutuk 27; libru sira ne’e koalia kona ba Jezus nia moris, knar sira ne’ebe nia halao to’o mate no moris hias.

Nudar sarani ita presiza lee barak kona ba Maromak futar lia atu nune’e ita bele hatene loos  ita nia orijin nudar ema kristaun ne’ebe hola parte iha reinu ida Maromak nian.

Bainhira Mons Mario remata nia liafuan, foinsae sira husi grupu 5 ba simu Maromak nia futar lian, lilin no kruz husi Amo Vigario Parokia Balide nian Padre Venseslau de Deus, Pr. Grupu sira ne’ebe hola parte iha Kampu Biblia ne’e.

Iha grupu laran Irma FMA sira ne’ebe responsavel ba grupu ida-idak fahe figura Mizerikordia nian  kona ba Zaque, Mateus, Filho prodigo, Bibi lakon no Maria Madalena no mos fo perguntas  ba partisipante sira tuir kontestu Biblia no realidade ohin loron nian.  Foinsae sira ho intuziasmo  rona ho atensaun pregadora sira nia haklaken kona ba figura 5 ne’e, hanesan buat ruma foun ba sira nia moris tanba sira balun foin halo esperensia ba dala uluk iha kampu ne’e.

Iha lorokraik taka ho misa inseramentu  nian ne’ebe preside husi Amo Vigario Parokia Balide, Padre Venseslao de Deus .

(Ines Bartolo Freitas)