Sidade Vaticano (RV) – Iha katekeze kuarta nian (11-4-13), Amu-Papa Francisco kontinua ninia esplikasaun kona-ba Jezús nia moris-hi’as. Nia esplika katak fiar sarani hanesan uma ida ne’ebé harii iha aliserse metin nune;e mós, nia fundamentu mak Kristu nia moris-hi’as.

Francisco explika katak hanesan apóstolu Pedro dehan, iha ninia surat dahuluk nia inísiu (kf. I Pd 1, 3-4), Jezús nia moris-hi’as mak buat ruma foun. “Ita sai livre husi moris atan salan nian no ita sai Maromak nia oan sira, ba moris foun”. No ida-ne’e akontese iha Sakramentu Batizmu, Amu-papa dehan. “Espíritu Santu, ne’ebé ita simu iha batizmu, mak lori ita atu dehan Maromak Aman”.

 

[Asesu kópia ho lia-portugés]

 

Santu Padre afirma katak “sai Maromak oan” mak prezente boo tliu ema simu husi Mistériu Paskál Jezús nian. “Maromak haree ita nu’udar oan sira, komprende ita, hakohak ita, hadomi  ita, maski ita halo sala”.

Nune’e, Amu-Papa esplika, relasaun filiál ho Maromak mak rikusoin ida ne’ebé presiza haburas loroloron, hodi rona Maromak nia Liafuan, iha orasaun, iha partisipasaun sakramentu sira-nian, liuliu konfisaun, Eukaristia no karidade.

“Ita bele moris nu’udar oan sira. No ida-ne’e mak ita-nia dignidade. Ne’e signifika katak, loron ba loron ita husik Kristu transforma ita no halo ita sai hanesan Nia; signifika koko moris nu’udar sarani, koko tuir Nia, maski ita haree ita-nia limitasaun no frakeza sira”, Amu-Papa hateten.

Santu Padre fó hanoin kona-ba tentasaun, ne’ebé nafatin hafuhu ita, atu halo ita husik Maromak, no tau ita-nia an iha sentru. Esperiénsia salan nian, tuir nia, hakanek vida sarani, hakanek kondisaun nu’udar “Maromak nia oan sira”.

“Ita tenke iha aten-barani fiar nian no keta husik mentalidade ne’ebé dehan katak ‘ la presiza Maromak, nia la importante ba ó’ atu babeur ita. Kontráriu ba buat ne’e, hodi de’it moris nu’udar Maromka oan, hodi la dezanima ba ita-nia keda sira, sente katak Nia hadomi ita, mak ita-nia moris sai foun, hetan hakmatek no ksolok. Maromak mak ita-nia kbiit, ita-nia esperansa”, dehan Papa Francisco.i

Remata Katekeze, Papa Francisco kumprimenta peregrinu sira iha Prasa S. Pedro, no b adala uluk, nia halo saudasaun ho lia-españól ba sarano sora husi España no nasaun sira latinu-amerikanu. Ho forma espesiál ba nia maluk rai hanesan husi Club Atlétiku San Lorenzo de Almagro, Buenos Aires (tim ne’ebé nia sai fans).