Jubileu mak tempu mizerikórdia ba ema hotu, di’ak no aat
RV – “Perdaun iha Krús” mak tema katekeze Papa Francisco nian iha loron kuarta, 28. Reflesaun bazeia ba relatu evanjelista Lucas (23,39-43) nian kona-ba ema ahu-na’in na’in rua hedi iha krús hamutuk ho Jezús, iha-ne’ebé ida-idak dirije ba Jezús tuir ninia modu.
Hodi mate iha krús iha kriminozu na’in rua nia leet, Nia ne’ebé inosente, kumpre doasaun eh saran an domin nian hodi salva umanidade ba nafatin. Nune’e hatudu katak, Maromak nia salvasaun bele to’o ba ema hotu, iha kondisunu naran de’it, maski ida susar liu. “Tanba ne’e, Jubileu mak tempu grasa no mizerikórdia nian ba ema hotu, di’ak no aat, iha saúde eh iha moras. La iha buat ida bele haketak ita husi Kristu nia domin!”.
“Ba ema ne’ebé hedi iha krús iha kama ida ospitál nian, ba ema ne’ebé sulan iha prizaun, ba ema ne’ebé funu bobar nia, ha’u hateten: Foti matan ba Krusifikadu. Maromak ho imi, horik ho imi iha krús no ba imi hotu oferese An nu’udar Makso’ik”, Amu-Papa hatutan.
Na’ok-teen di’ak ne’ebé respeita Maromak
Ahu-na’in dahuluk insulta Jezús iha Krús: “Ó la’ós Kristu? Salva Ó-nia an rasik no ami!”. Tuir Papa Francisco, ida-ne’e mak hakilar ida laran-susar nian, iha mistériu mate nia oin, nia hatene katak Maromak de’it bele fó resposta ida salvasaun nian.
Ema ahu-na’in daruak hanaran “na’ok-teen di’ak” no ninia liafuan sira mak modelu furak arrependimentu nian, Amu-Papa observa. Uluknanai, nia dirije ba nia maluk: “Ó nein hamta’uk Maromak, ó ne’ebé terus kastigu hanesan?”, espresaun ida ne’ebé evidensia ‘hamta’uk Maromak’ – la’ós ta’uk ba Maromak – maibé respeitu ne’ebé soi atu fó ba Nia.
Papa Francisco esplika katak na’ok-teen di’ak dirije diretamente ba Jezús, konfesa abertamente ninia salan rasik, husu ninia ajuda, bolu Nia ho naran, husu Jezús atu hanoin nia: ema nia nesesidade atu la sai abandonadu. Nune’e ema kondenadu ba mate ne’e sai modelu sarani ida ne’ebé entrega an ba Jezús.
Perdaun ho jestu konkretu sira
Promesa halo ba na’ok-teen di’ak – “Ohin ó hamutuk ho ha’u iha Lalehan” – revela kumprimentu loloos Jezús ninia misaun ne’ebé halo nia tun mai rai. Husi hahú kedas to’o rohan, Jezús hatudu nia An nu’udar Mizerikórdia; Nia mak loos duni, Aman nia mizerikórdia nia oin: «Aman, perdua sira, tanba sira la hatene saida mak sira halo». No ida-ne’e la’ós liafuan de’it, maibé jestu konkretu nu’udar perdaun oferese ba na’ok-teen di’ak.
Amu-Papa remata ninia katekeze hodi konvida ema hotu atu husik kbiit Evanjellu nian penetra fuan no konsola, fó esperansa no serteza íntima katak la iha ema ida esklui husi perdaun.
