Marian Camp iha komunidade FMA Maddalena Morano
MARIAN CAMP husi loron 6-7 Abríl-2013
Fuiloro – Marian Camp ida ne’e halo ho objetivu rua: ida, atu joven sira bele koñese Maria Santissima ninia papél iha istória salvasaun nian; rua, tanba tinan ida ne’e espesiál ba Institutu FMA iha Timor-Leste ne’ebe mak sei halo tinan 25 prezensa FMA iha Timor. No tuir Tema ne’ebé hili ona mak “Maria halo buat hotu”. Ho motivasaun hirak ne’e mak dudu ami atu organiza hamutuk ho joven sira hodi halo marian camp ida ne’e.
Oinsá prepara Camping ida ne’e? Tuir irmán Lucia Pereira loloos kampu marianu ne’e programa tiha atu halo tinan kotuk, maibé tanba la konsegue halo nune’e halo iha tinan ida ne’e.
Camping ida ne’e joven sira rasik sai protagonista. Camping fahe ba faze sira hanesan tuirmai ne’e: preparasaun, bemvinda, formasaun mariana iha ida-idak nia tenda ho input no servisu grupu nian, no selebrasaun finál hafoin taka ho Eukaristia.
Iha preparasaun, grupu ida-idak sente responsavel hodi kria ambiente rasik tuir Maria ninia itineráriu. Sira hahú preparasaun husi fulan Marsu nia laran. Iha sentru oratóriu ida-idak (FMA sira halo atividade iha sentru oratóriu 5) sira prepara poezia, knananuk, dansa, drama tuir tema: MARIA HALO BUAT HOTU. Husi sira-nia preparasaun ida ne’e bele haree katak sira asimila buat barak. Loron preparasaun ikus nian mak loron 4-5 Abríl, sira harii tenda no fatin oioin ho panorama oioin.
Atu realiza didi’ak itineráriu Maria nian joven sira fahe ba grupu neen no grupu ida-idak kompostu husi irmaun SDB, irmán FMA hamututk ho animadór/a no foin-sa’e sira. Grupu sira hanaran tuir fatin sira Maria nia dalan/itineráriu fiar nian:
- Nazaré (responsavel irmán Meira)
- Ainkarim (responsavel irmán Alice)
- Belein (responsavel irmán Inés)
- Templu (responsavel irmán Albina no irmaun Albinu SDB)
- Kanaan Galileia (irmán Suzana)
- Kalváriu (responsavel mak irmán Isaura FMA no Ir. Julino, SDB)
Durante formasaun grupu sira mós dramatiza fali eventu ida-idak iha Maria nia moris hodi hatudu oinsá sira-nia asimilasaun kona-ba esperiénsia fiar hamutuk ho Maria.
