Gratidaun no peregrinasaun jubilár Inspetoria FMA TIN- 2016

Manatuto – Festa gratidaun inspetoriál tinan 2016 sai partikulár tanba tau hamutuk agradesimentu no Jubileu Mizerikórdia. Selebra Tinan Santu Mizerikórdia hamutuk ho komunidade edukativa iha okaziaun Festa anuál Gratidaun Inspetoria nian (24-9-2016), mak resposta ida ba Madre Jerál nia proposta fó iha sirkulár 958, atu selebra hamutuk Maromak nia mizerikórdia. Nune’e, FMA no komunidade edukaktiva halo peregrinasaun jubilár ba Manatuto hodi selebra Eukaristia no halo konvíviu hamutuk. Atividade hahú ho peregrinasaun: Zona Dili no Maliana sira halo peregrinasaun husi loromonu to’o ba Odamatan Santu, zona Baucau no Lospalos husi parte lorosae. Grupu rua hasoru malu iha Odamatan boot molok tama Igreja, ne’ebé harii iha 2015 atu komemora misaun Manatuto ba tinan 200.

Hotu tiha peregrinasaun, tutun ba selebrasaun mak Eukaristia, ne’ebé Pe. Martinho da Silva Gusmão, pároku Manatuto nian, mak selebra. Foti hanoin ruma husi leitura sira loron nian, Amu Martinho husu atu tau atensaun ba Maromak nia mizerikórdia hatudu iha ilas krús Jezús Kristu nian. Nia hateten ida-ne’e liga ho amlulik balun ninia hakarak atu tau tiha ilas ‘krús joven’ iha muzeu, tanba krús ne’e agora la atrativu. Ema uza hodi tara buat oioin ba leten, sai fali buat ruma liga ho superstisaun sira. Se ita tau krús ba sorin ita la komprende esénsia Maromak nia laran-sadia. Nune’e mak presiza tebes renovasaun espirituál.

Maromak nia mizerikórdia mós sai tópiku ba Ir Alma Castagna, provinsiál, ninia lia-menon. Nia uza ai-kanoik feto ne’ebé lakon nia osan atu fó hanoin ruma kona-ba Maromak nia laran-sadia mai ita. Feto ne’e hanesan Maromak ne’ebé lakon nia doit ki’ik-oan ida, nia la haksolok atu husik de’it doit folin-laek ne’e, maibé halo ‘operasaun boot’ atu hetan fila flai osan doit ne’e. Nia buka osan doit oan ne’e, la’ós tanba nia kiak…maibé tanba nia valoriza ema ida-idak. Ita mak osan ida-ne’e, ne’ebé Maromak, atu buka Nia tenke hakruuk no foti hikas ita.

Ita aprende husi Maromak atu  hatene apresia malu, agradese malu, ba ida-idak nia moris, ninia kapasidade, maski ita sente ita la folin, ita ki’ik eh kiak. Ida-idak mak impornte ba Maromak.

Ikusmai, provinsiál agradese mós parókia Manatuto, Pe. Martinho, Ir Imelda Coimbra fdcc no ekipa sira ne’ebé prepara fatin no ai-han atu FMA no komunidade edukativa bele hala’o sira nia selebrasaun iha atmosfera ida uma nian no komodidade.

Husi parte seluk, komunidade FMA iha Jakarta mós halo sira nia peregrinasaun atu sai ida de’it ho inspetoria iha loron agradesimentu ida-ne’e, hodi ba Igreja ‘Lubang Buaya’.

Obrigada!