Padre João de Deus Pires mak misionáriu ida tanba obediénsia iha rai Timor-Leste husi kedas tinan 1958. Nune’e tinan 55 ona mak nia moris iha Timor-Leste. Nia mós mak pioneiru atu loke obra saleziana iha Baucau inklui Colégio Fatumaka ne’ebé tinan oin selebra tinan 50. Iha Tinan Fiar nian ida-ne’e FMA TIN TATOLI edisaun Mar-Abr 2013 aprezenta entrevista ida halo ba nia ne’ebé oras ne’e redasaun tau mós iha mediun ida-ne’e.

Bainhira padre to’o iha Timor, oinsá situasaun Evanjelizasaun kristán?

Iha tempu ne’ebá buat hotu normál, evanjelizasaun la’o di’ak.

Ita hatene misionáriu uitoan de’it, ma’ibé konforme situasaun no oinsá ida hatene book an hodi envolve ema sira, ha’u haree katak ema sira dispostu, adere ho modu voluntáriu ba buat ne’ebé ita propoin. Iha 1962 ha’u mai Baucau, sarani sira hamutuk 12.000 ba distritu tomak. Ha’u la moris iha presaun, la iha posibilidade sira no la’o ba oin neineik-neineik, sarani ema sira; Timór oan sira ema di’ak, nune’e sira ho laran simu sakramentu batizmu hodi adere ba Kreda Katólika.

 

Ita bele dehan katak padre moris etapa tolu istória evanjelizasaun nian…

Tolu ka haat. Ha’u prefere hanaran dinastia. Dinastia dahuluk mak ida ho ho prezensa ema-portugés sira-nian husi 1958-1974. Ha’u pasa tinan haat iha Dili no restante iha zona Baucau nian, menus tinan 1969-1970 mak ha’u bá hela iha Fuiloro ba fulan sanulu, hafoin bá fali zona Baucau nian to’o tinan 2008. Dinastia daruak mak invazaun, konfuzaun, hahú partidu sira, preparasaun no kombinasaun entre governu portugés ho indonéziu to’o loron invazaun. Pratikamente tinan rua de’it, husi tinan 1974, bainhira mosu revolusaun kravu sira-nian iha Portugál to’o bainhira Indonézia tama iha Timór. Ne’e períodu ida terus boot. Dinastia datoluk mak tempu invazaun Indonézia husi tinan 1975 to’o 1999 ne’ebé lori terus naruk. Dinastia ikus mak tempu independénsia Timor-Leste nian.

Sá de’it karakterístika sira etapa ida-idak…

Ida-idak iha ninia karakterístika partikulár devidu situasaun polítika nasaun atuál nian. Ida uluk iha situasaun kalma, ho governu kolonialiasta ne’ebé ba ha’u la’ós nune’e. Ne’e governu edukadu ida, laran-sadia ho povu, amizade. Portugés sira mak administradór do posto ka xefe postu ruma, maibé buat ne’ebé ha’u admira mak familiaridade entre timorense sira no portugés sira no ha’u gosta tebes. Tinan haat iha Dili iha ambiente hanesan ne’e ha’u bele moris ho proveitu boot ba vida misionária no vida espirituál ho atividade saleziana barak hanesan harii grupu “Devotos de Maria Auxiliadora”, “Cooperadores”, “Antigos Alunos” no  eskola… Depoizde tinan haat apostoladu iha Dili, mak Dom Jaime Goulart, haree ba salezianu nia servisu apostoladu nian, entrega misaun Baucau nian ba Kongregasaun Saleziana, kontra povu nia hakarak, kleru nian… Tan ha’u ta’uk ha’u ba hasoru nia, Dom Jaime dehan: “ha’u mak fó ó-nia naran ba provinsiál. Entaun, ó la’ós foin-sa’e forte, ó ta’uk? Ó lalika ta’uk, buat seluk ne’e ho ha’u, ó bá”. Ha’u simu insultu, ema kritika no murmura… maibé ne’e evanjelizasaun fó fuan maka’as. Ha’u to’o ha’u haree katak ambiente misaun nian preparadu ona. Padre sekulár sira artista iha buat ne’e ho prezensa padre Brito nian. Ha’u mai, hahú, ha’u rekoñese katak la iha esperiénsia apostoladu nian se la’ós ho juventude, maibé ikusmai ha’u komesa gosta liu povu no ia ne’e mak mai prova ida kona-ba sistema Don Bosco nian. Ita bá hasoru povu liuhusi labarik sira, no la’ós husi povu ba labarik sira. Ha’u ba vizita suku barabarak, buat ne’ebé padre sekulár la halo iha tempu ne’ebá tanba la iha forsa no espíritu salezianu, i entaun hau admira ho labarik barak ne’ebé nunka bá eskola, nunka estuda, nunka haree padre ida… nune’e ha’u husu liurai atu halo lalais eskola ida envezde dehan: “mai ita halo kapela ida”. Ba saida? Atu hafoin taka hela durante fulan 4-5 enkuantu padre la bá iha ne’ebá? Nune’e hanesan Don Bosco, ha’u tulun atu loke eskola sira. Ba profesór sira ha’u arranja husi Fuiloro, tanba iha joven sira hotu kuarta klase ka mestre barak seluk (hanesan ó-nia papá). Nune’e ha’u loke eskola sira, aleinde sai eskola ensinu fundamentál, sai mós momentu evanjelizasaun, katekeze. Ha’u haruka ba ne’ebá profesór katekista sira ne’ebé fó katekeze ba inisiasaun moris sarani no haree mós kapela, i bainhira padre bá sira preparadu atu simu sakramentu. Misaun saleziana hahú husi labarik no husi labarik ba adultu sira. Ita prepara labarik sira, hafoin, labarik sira mak lori ba inan-aman ksolok fiar nian no dada boot sira ba Kreda. Se ita halo avaliasaun ida parókia Baucau no seluk ita haree diferensa. Iha ita-nia zona sira, povu sira nafatin hamutuk ho ita tanba ita tau matan ba sira-nia oan.

Ita mós mak fundadór eskola Fatumaka nian…

Sín iha ne’e, ha’u mak fundadór. Ha’u laós idealizadór maibé realizadór. Iha tinan 1963, padre provinsiál SDB Portugal, padre Armando Monteiro, mai iha Timór no ami ba vizita. Nia mak dehan “Cala-te e vai”. Ami ba ko’alia ho Bispu D. Jaime no nia dehan imi nune’e: ‘Keta haluha katak misionáriu sira iha knaar atu fila rai atu entrega ba kleru rai-na’in/nativu. Maibé entrega tiha imi la bele fila. Imi tenke kontinua iha Timór. Nune’e imi buka arranja uma ida imi-nia propriedade rasik’. Nune’e ami ba ko’alia ho Governadór atu husu tulun atu harii uma ida. Nia dehan nune: “Ha’u ateu ida, maibé ba Don Bosco ha’u sei tulun”. Ha’u ba Baucau no tanba ha’u gosta rai Venilale, ha’u ba semana-semana. No liuhusi Fatumaka iha parte ida iha okos, ha’u sente atrasaun boot, no maski seidauk haree fatin, ha’u ba ko’alia ho liurai sira. No sira hakarak koléjiu ida-ne’e. No iha 1963 hahú serbisu sira. Irmaun salezianu na’in rua hela iha ne’ebá no ba tinan rua sira iha de’it misa iha domingu, bainhira ha’u ba Venilale, liu husi sira no tula sira atu ba hamutuk. Hahú ho uma andár. Enjeñeiru portugés ida halo planta, marka, sukat no nia husu atu selu. Ha’u dehan ita belun, konfia ha’u no ha’u sei buka atu selu. Nia dehan: la buat ida, maibé bainhira ha’u mate ita reza misa ida mai ha’u. Providénsia mak arranja buat hotu. La iha mestre konstrusaun nian no iha belun xinés ida karpinteiru mak sai ezekutadór. Materiál ha’u ba foti husi belun seluk Xina Lay. Nune’e hahú eskola andár, halo dormitóriu no ofisina karpinteria nian. Povu tulun halo barakaun sira ba internatu. Komunidade mós moris iha barraka ida. Buat seluk halo ho padre Locatelli no ho Indonéziu sira nia tulun. Eskola hahú iha 1964.

Fila fali ba etapa evanjelizasaun: tempu invazaun nian…

Iha tempu invazaun Indonézia nian mak ita haree pontu negativu no pozitivu sira. Negativu mak kuantidade, la’ós kualidade. Obrigasaun atu iha relijiaun ida, no iha ne’e ema hotu hakarak simu batizmu mós nu’udar defeza ida kontra invazaun. Dala ida iha Baguia, iha selebrasaun ida ha’u sarani ema adultu na’in 800. Ne’e atu iha naran sarani ida nune’e iha indonéziu sira nia oin sira katóliku ona, iha ha’u-nia asinatura (iha tempu ne’ebá ha’u-nia asinatura vale liu…); depois iha tempu no bainhira sira bele, sira tuir formasaun sarani.

 

Ita agora tama iha etapa ikus no ha’u hanoin ita bele dehan katak husi rezultadu moris sarani nian, evanjelizasaun superfisiál de’it.

Superfisiál liu maibé piór liu ba ha’u, superfisiál liu ne’e mak ema Kreda nian, kleru no ema konsagrada/u sira. Ita la hakle’an fiar, la moris fiar, la buras iha moris konsagrasaun nian. Iha formasaun, semináriu tuir regra, buat hotu improvizadu, hafoin ho tempu husik ba oin, ba oin… falta formasaun kontínua, la iha kualidade moris nian, laiha vida piedade nian, vida orasaun kle’an. Porezemplu iha ne’e (Lospalos) iha komunidade formasaun pré-novisiadu iha loron namoradu sira-nian ha’u sai admiradu tanba superiór sira selebra ho sira loron namoradu nian. Entaun ita halo hilin ida no moris pasu ida ba finalidade vida konsagrasaun ba Maromak no ita permite atu iha mós buat seluk? Entaun problema ne’e nivel ema sira Kreda nian.

Maibé, iha nivel leigu sira-nian mós tanba durante funu sira kesi an ba Kreda, agora sira hadook an ba daudaun husi moris sarani loos…

Sín, nune’e duni. Kreda tomak tenke renova an. Ha’u haree leigu barak ne’ebé uluk serbisu ho ha’u agora na’in hiira mak sei kontinua serbisu ba Kreda? Iha tempu Indonézia, pratikamente ba tinan 18 ha’u mesak amlulik ida ba mai foho, sé mak sai tulun boot? Leigu sira. Sira ba ho ha’u iha Quelicai, Afasá, Lavateri, Baguia… Sira barak iha família maibé sai katekista volontáriu/a. Sira mak prepara katekúmenu sira tuir buat ne’ebé sira hatene atu simu sakramentu sira (batizmu, konfisaun, komuñaun, kazamentu). Uluk kolaborasaun boot mós mai husi antigu/a alunu/a sira no kooperadór/a sira. Formalmente la iha organizasaun, maibé iha prátika sira kolabora iha misaun saleziana. Ohin loron la haree. Ba festa sira ita haree sira barak! Oras ne’e sarani barak moris hanesan Maromak laiha!

Ita ko’alia kona-ba difikuldade sira misionáriu nian. Maibé, sá de’it ksolok sira ne’ebé ita hetan, ita-nia ksolok boot liu?

Ha’u nunka konsidera ha’u-nia an misionáriu. Nu’udar batizadu ita hotu, ha’u mós, sarani sira hotu mak manu-ain/enviadu. Ha’u simu orden husi superiór atu bá: “Cala-te e vai”. Mós husi Dili bá Baucau, superiór dehan: “Ó hakarak atu ha’u haruka iha obediénsia nia naran?” Bainhira ha’u bá dehan ba bispu D. Jaime katak ha’u la iha esperiénsia nune’e husu atu tulun ha’u, nia hahú hamnasa no dehan: “Ha’u mak fó ó-nia naran ba provinsiál”. Ha’u bá. Ha’u hetan ambiente haksolok, di’ak, ho liurai sira hotu ne’ebé di’ak no kolabora maka’as no mós katekista no ema sira ne’ebé iha. Ne’e hotu haksolok ha’u. Defaktu padre Afonso Nacher (matebian) bainhira hakerek ba Macau hodi deskreve ami salezianu sira, kona-ba ha’u nia dehan katak ha’u iha liurai no katekista leigu sira hotu iha ha’u nia liman. Ha’u hakfodak ho nia hakerek ne’e no ha’u hanoin katak ida-ne’e naturál. Maibé, ha’u nia ksolok boot mak halo nafatin Maromak nia vontade la’ós ha’u-nian. Ema sira ne’ebe’ ema Baucau, Quelicai, sira hakfodak ho oinsá misaun buras no basa liman. Maibé la’ós ha’u-nia obra, Maromak uza ha’u. Atu dehan de’it iha zona ne’e ha’u sarani ema liu 80.000. Ha’u hatene númeru ne’e tanba ha’u-nia belun sira iha kartóriu konta númeru ema sira ne’ebé ha’u sarani. Ne’e hotu iha tempu Indonézia, no ha’u sente remorsu uitoan. Maibé atu dehan lae ka sín, dia’k liu ita prepara sira nu’udar ita bele.  Iha duni preparasaun fulan 6-7 nia laran, tuir tempu no kapasidade ne’ebé iha.
Nune’e, buat importante halo Maromak nia vontade, ha’u lakohi mai Timór, maibé Nia mak manán, nune’e ha’u hela no serbisu iha Timór ba tinan 55 nia laran ona.

Bele fó hanoin ruma ka rekomendasaun ruma atu aplika Evanjelizasaun Foun ne’ebé Bento XVI ko’alia, ne’ebé sai motivu Sínodu tinan kotuk, Kreda universál husu?

Maski Bento XVI renunsia ona nia kargu no ida-ne’e mistériu ida, maibé ne’e hahalok profétiku ida. “O Papa foi um grande”. Buat ne’ebé loos, Kreda tenke muda. Amu-Papa foun ne’ebé mai tenke muda buat ruma hahú husi ierarkia, hahú husi Kúria Romana, bispu, padre, madre sira, ema sarani hotu. Presiza evanjeliza an rasik uluk, konverte an, konversaun pesoál. Presiza muda ba buat di’ak. Ba Kreda Timór, ita rona bispu, nia mós dehan presiza halo mudansa. Ita husu se loos duni ita fiar-na’in ida. Ita salezianu sira mós tenke muda.

Ita bele dehan, hato’o ita-nia mehi ruma ba mudansa Salezianu/a sira?

Uluknanai ita tenke haree katak sá sai relijiozu/a, votu sira ita halo volontariamente, hatudu katak ita hili dalan ida santidade espesiál nian hodi moris ita-nia konsagrasaun.  Ora, atu moris ita-nia konsagrasaun, laós de’it tuir maneira konsagrasaun batizmál ne’ebé kontente halo sinál krús nian, ba missa/halo missa ida iha fatin ne’ebá no ita moris kontente no hakmatek ona. Lae. Ita konsagradu salezianu iha ita-nia piedade. Se ita la tuir piedade saleziana ita la bele sai relijiozu salezianu. Uluknanai ita haree oinsá ita-nia vida relijioza hafoin mak ba misaun. Ha’u uluknanai relijiozu hafoin mak misionáriu, administradór buat ne’e nian, profesór, knaar naran ida ne’ebé ita halo didi’ak, nune’e misaun kumpre ona. Deskulpa, maibé ami barak atu halo misaun didi’ak ami haluha tiha misaun prinsipál ida santidade nian. Iha tempu ba halo buat barak seluk maibé la iha tempu ba buat primeiru planu nian katak vida santidade nian. Maromak hanesan horisehik, ohin, abanbairua. Nune’e sai santu hanesan Nia santu mak bolun ida ne’ebé la muda, no ita tenke moris santidade ida-ne’e agora. La interesa se ha’u hatais kalsa metan ka mutin, maibé vida interiór, domin ba vivénsia piedade nian liga ho Jezús, atu liuhusi meiu ida-ne’e ita sai apótolu juventude nian. Indispensavel mak ita tenke fó atensaun ba formasaun salezianu sira-nian. Ami iha uma formasaun iha Baucau, Dili, iha-ne’e (Lospalos) ba vokasaun sira no ba ami ne’ebé sai ona salezianu laiha atensaun nein ida! Iha retiru ruma hanesan ne’e, maibé deskulpa iha ha’u-nia zona ami halo retiru fulan-fulan hamutuk, iha ne’ebé loloos hanaran “esercísio da boa morte” (maibé agora la bele dehan nune’e), porezemplu halo iha FMA sira-nia uma iha ne’ebé madre diretora pasa iha televizaun boneka oan ruma, hato’o Amu-Papa nia liafuan iha minutu 15 de’it, hafoin karik ema ruma hakarak konfesa. Ita pasa ba jantár, irmaun no irmán sira han hemu, hamnasa no hotu ona. Ita tenke para ho buat hanesan ne’e. Ita tenke fó naran loos, eziste infernu, eziste salan, diabu eziste… Maibé agora ema ida la ko’alia ona kona-ba buat hirak ne’e, kona-ba formasaun konxiénsia nian… Presiza duni fó atensaun ba formasaun kontínua.