RV – Amu-Papa Francisco kontinua ninia katekeze kona-ba mizerikórdia, no iha kuarta, 21 Setembru, nia reflete kona-ba “misericordiosos como o Pai”. Amu-Papa destaka katak perdaun mak “coração da misericórdia”. Hamutuk ho nia saran-an, konstitui ai-riin/koluna ba konvivénsia fraterna.

 Download

Papa Francisco esplika katak, bainhira Jezús husu atu ema sai laran-sadia, Nia la hanoin kona-ba kuantidade, maibé eskolante sira-nia kompromisu atu sai sinál sira, kanál sira, sasin sira mizerikórdia rohan-laek Maromak nian. Tanba ne’e mak, Igreja bele de’it sai sakramentu mizerikórdia Maromak nian iha mundu, iha tempu hotu no ba umanidade tomak.

Iha prátika, Papa Francisco hatutan, sai mizerikórdiozu signifika hatene perdua no saran an. Jezús la pretende troka justisa umana nia lala’ok, maibé Nia fó hanoin katak atu iha relasaun fraterna presiza hapara tesi-lia eh juízu sira no kondenasaun sira.

“Ema sarani tenke perdua. Tanba sá? Tanba nia simu perdaun. Ita hotu ne’ebé iha Prasa ida-ne’e simu perdaun. Ita hotu, iha ita-nia moris, sente nesesidade kona-ba Maromak nia perdaun. Tanba ita simu perdaun, ita tenke perdua. Loroloron ita harohan Ami Aman: perdua ami salan, nu’udar ami perdua ema halo aat ami. Nune’e fasil perdua. Se Maromak perdua ha’u tanba sá ha’u labele perdua? Ha’u boot liu Maromak? Imi komprende didi’ak buat ne’e?”

Amu-Papa fó hanoin mós katak tesi-lia no kondena maluk ne’ebé halo salan ne’e la loos, basá la iha ema ida aas liu ema seluk ne’ebé halo salan, maibé, loos duni, ita iha devér atu rekupera ninia dignidade nu’udar Maromak nia oan no akompaña nia iha dalan konversaun nian. “Maromak lakohi hewai nia oan sira ida”, Amu-Papa salienta.

Perdua mak koluna dahuluk ne’ebé sustenta komunidade sarani. Daruak mak saran an. Prontu atu saran an, signifika obedese lójika koerente ida: bainhira ha’u simu husi Maromak, ha’u saran ba maluk, no bainhira saran ba maluk ha’u simu husi Maromak! Tanba ne’e, domin mizerikordiozu mak dalan ida mesak atu la’o tuir, Amu-Papa kontinua.

“Ita hotu iha nesesidade atu sai mizerikordiozu uitoan tan, atu la ko’alia aat ema seluk, atu la julga, atu la ko’alia aat ho krítika sira, ho inveja, ho laran-moras. Lae! Perdua, sai mizerikordiozu, moris ita-nia vida iha domin no saran an. Domin ida-ne’e permite atu Jezús nia eskolante sira la lakon identidade ne’ebé simu husi Nia, no rekoñese sira nia an nu’udar oan sira husi Aman hanesan.  Imi keta haluha buat ne’e: mizerikórdia no don. Perdaun no saran-an. Nune’e fuan sei sai boot iha domin. Egoízmu, hirus halo fuan sai ki’ik, toos hanesan fatuk. Saida mak imi prefere: fuan fatuk nian eh fuan nakonu ho domin? Se imi prefere fuan nakonu ho domin, imi sai mizerikordiozu bá!”, Amu-Papa remata.