Assisi (Itália) – Violénsia hodi Maromak nia naran la reprezenta natureza loloos relijiaun nian no krensa hotu tenke kondena, Papa Francisco dehan.

“Ita la kole atu repete katak Maromak nia naran nunka bele justifika violénsia. Damen de’it, no la’ós funu, mak santul!” Amu-Papa dehan ida-ne’e iha loron 20 Setembru ba enserramentu enkontru inter-relijiozu damen nian halibur iha Assisi.

Depoizde orasaun ho líder Sarani sira, inklui Patriarka Bartolomeu (Ortodoksu) no Arsebispu Justin Welby (Anglikanu), Amu-Papa hamutuk ho líder relijiaun sira husi mundu halo apelu ba damen no unidade.

Iha ninia diskursu, Papa Francisco konvida fiar-na’in sira “atu enfrenta moras boot ita-nia tempu nian: indiferensa”.

“Ne’e mak vírus ida ne’ebé que paraliza, halo ita maten no insensivel, morbu ida ne’ebé afeta sentru relijiozidade nian hodi prodús paganizmu foun no triste liu: paganizmu indiferensa nian”, Amu-Papa hateten.

Hafoin Amu-Papa fó hanoin katak ema sira ne’ebé buka damen la iha kilat; maibé sira fiar iha kbiit husi “orasaun maus no umilde”. Amu-Papa husu atu hapara funu, terrorizmu no violénsia sira. “Damen ne’ebé ita invoka, husi Assisi ne’e, la’ós protestu simples ida kontra funu, la’ós mós «rezultadu negosiasaun sira, kompromisu polítiku sira eh akordu ekonómiku sira maibé, rezultadu orasaun nian»”, nia afirma.

Amu-Papa hatutan tan katak orasaun no vontade atu kolabora halo ita haka’as an ba damen loos nian, la’ós iluzória. Damen ne’e mós dehan lae ba “sinizmu husi ema ne’ebé fase liman hasoru ema seluk nia problema sira” Amu-Papa husu atu la halo de’it abordajen virtuál hodi tuur de’it iha komputadór nia oin, atu rezolve problema sira hodi la loke matan ba maun-alin sira nia nesesidade eh la hafoer liman sira atu tulun ema ne’ebé presiza.

Ikusmai, Papa Francisco hatetne katak, xefe relijiozu sira, iha obrigasaun atu sai “ponte metin diálogu nian, mediadór kriativu damen nian”. No hodi dirije ba líder sira nasaun nian, nia husu hodi relijiaun nia naran, atu keta kolen buka no promove dalan sira damen nian, hodi hakat liu interese rasik no interese momentu nian.

“Imi keta halo monu iha buat-mamuk Maromak nia apelu ba konxiénsia sira, ema kiak sira nia hakilar damen nian no jerasaun foin-sa’e sira ninia mehi di’ak sira”, Amu-Papa remata.