Liturjia domingu ne’e nian propoin mai ita, dala ida tan, reflesaun kona-ba ita-nia relasaun ho soin sira mundu ne’e nian… Nia konvida ita atu haree sira, la’ós nu’udar buat ruma ne’ebé pertense mai ita ho modu eskluzivu, maibé nu’udar don sira ne’ebé Maromak tau iha ita-nia liman, atu ita administra no fahe, ho gratuidade no domin.

Iha primeira leitura, profeta Amós denunsia ho forsa klase dirijente ida ne’ebé moris iha luxu no halo esplorasaun ba ema-kiak sira no la preokupa liu ho ema ki’ik sira nia mizéria. Profeta haklaken katak Maromak sei la taka matan ba situasaun ida-ne’e, basá sistema egoízmu no injustisa nian la la’o ho projetu ne’ebé Maromak mehi ba ema sira no ba mundu.

Evanjellu aprezenta mai ita, liuhusi ai-knanoik ema riku no ema kiak naran Lázaro, katekeze ida kona-ba posesu rikusoin sira… Iha Lucas nia perspetiva, rikusoin mak nafatin salan ida, basá supoin apropriasaun, ba benefísisu rasik, don sira ne’ebé Maromak destina ba ema hotu… Tanba ne’e ema riku hetan kondenasaun no Lázaro hetan rekompensa.

Segunda leitura la aprezenta relasaun direta ho tema domingu ne’e nian… Nia trasa perfíl “Maromak nia emar” nian: nia ténkeser ema ida ne’ebé hadomi nia maun-alin sira, iha pasiénsia, ne’ebé laran-maus, justu no hatutan ho fidelidade Jezús nia proposta. Ita bele mós hatutan katak nia la moris ba an rasik, maibé fahe ho ema seluk nia an rasik no nia soin sira?

Download