Dili – Salezianu Vizitadoria ITM (Timor-Indonesia) ohin 9 Abríl,  hahú sira-nia Kapítulu Provinsiál no sei remata iha loron 12 Abríl 2013. Delegadu sira hamutuk 37 husi komunidade sira iha Timor-Leste no Indonesia. Kapítulu Inspetoriál tuir artigu 170 Konstituisaun SDB nian “mak reuniaun fraterna iha ne’ebé komunidade lokál sira reforsa sentidu hola-parte nian ba komunidade inspetoriál liuhusi atensaun komún ba problema jerál sira”.

Kapítulu Inspetoriál ne’e liuliu  preparasaun ba Kapítulu Jerál 27 SDB sira-nian atu: hakle’an tema “Testemuñu radikalidade evanjélika” (witness to the radical approach to the Gospel) no hili delegadu sira ba Kapítulu jerál inklui mós suplente.

Iha abertura membru sira kapítulu nian simu mensajen husi Reitór-Mor padre Pascual Chavez ne’ebé konvida sira atu “foti kompromisu pesoál no foun ba Jezús no ninia valór radikál sira (haree nia mensajen ho inglés iha ne’e). Padre Cereda (Konselleiru Formasaun nian no Reguladór KJ 27) mós haruka mensajen ida ho votus atu sira simu don atu sai “místiku iha Espíritu, profeta vida fraterna nian, no servu sira foin-sa’e nian” (haree nia mensajen kompletu ho inglés iha ne’e).

Tuir P. João Paulino (provinsiál SDB) loron rua nia laran sira sei fahe reflesaun kona-ba aspetu tolu perfíl salezianu foun iha komunidade lokál sira atu sai místiku, profeta no servu/atan, tuir tema Kapítulu Jerál 27 nia orientasaun sira. Loron terseiru, sira sei avalia sira-nia planu estratéjiku tinan 2010-2016 kona-ba prioridade tolu: formasaun, edukasaun, ekonomia sustentavel. Husi ne’e sira sei diskute atu kria diretóriu (kontein regulamentu/diretiva) ba SDB sira kona-ba prioridade tolu iha leten. Iha loron dahaat sei aprezenta orientasaun kona-ba protesaun ba labarik, “Behavior protocol dealng with children”. Iha loron ne’e mós sira sei halo eleisaun atu hili delegadu sira ba Kapítulu no nia suplente sira.

Loron primeiru ohin, sira hahú ho preparasaun espirituál ne’ebé padre Noel Villanueva SDB mak fasilita. Iha ninia  input nia haktuir katak “Kapítulu Provinsiál mak oportunidade atu sai husi “comfort zone” (situasaun hakmatek no kontente ho buat ne’e iha ona) atu bá iha “courage zone”, zona risku nian, hodi enfrenta dezafiu sira  (katak loke odamatan ba novidade) selae bele mate. Maibé la to’o sai ba li’ur. Presiza hatene kapasidade no kompeténsia rasik, talentu sira, rekursu sira, tanba nune’e de’it mak sai ba li’ur ne’e sai signifikativu. Atu halo pasu ba “courage zone” presiza konxiente kona-ba “core zone”. “Core zone” mak zona focus nian, iha ne’ebé soi bee-matan moris nian, espiritualidade saleziana, valór sira ne’ebé Don Bosco husik nu’udar liman-rohan hanesan haktuir iha mehi “diamante sanulu”. Importante tebes hatene “core zone” no horik iha “core zone” atu mantein da mihi animas cetera tolle, Don Bosco nia zelu lakan nafatin iha fuan.

Ohin loraik sei iha servisu iha grupu temátiku atu fahe kona-ba dimensaun místika (formasaun), dimensaun profesia vida fraterna nian (ne’ebé haree mós aspetu administrasaun) no dimensaun servisu nian ne’ebé liga ho misaun edukativa ba foin-sa’e sira (edukasaun).

Ami FMA sira, akompaña ho orasaun atu bele akontese Pentekoste foun iha ne’ebé prezensa Espíritu Santu nian sai animadora no inspirasaun ba kapitulár hotu nune’e, foti desizaun sira ne’ebé, loos duni, lori renovasaun vitál ba salezianu ida-idak iha sira-nia moris konsagrasaun nian.