Irmán, leigu no foin-sa’e doben sira

Iha fulan hirak ne’e, Amu-Papa Francisco fó prezente ida tan ba Kreda tomak: ezor­tasaun apostólika depoizde Sínodu “Amo­ris Laetitia”, iha ne’ebé Amu-Papa reflete kona-ba domin iha família laran hodi foti inspirasaun husi diskusaun no sujestaun ne’ebé mai husi Sínodu kona-ba família. Ita, ne’ebé tinan ida ne’e hili nu’udar liña asaun ida: “Haree hamutuk ho família sira rasik nia realidade ohin nian no pastorál famliár ida ne’ebé iha sintonia ho orien­tasaun Kreda nian”, presiza lee no aplika ba ita-nia realidade buat ne’ebé Amu-Papa hato’o iha surat ida ne’e. Iha ne’e ha’u lako­hi reflete se surat ida ne’e tuir doutrina Kre­da nian ka lori buat ruma foun liu, hanesan teólogu barak halo ona; ita rekoñese katak Amu-Papa, iha ninia diskursu hotu no iha ninia hahalok, hakarak hatudu Maromak nia laran-sadia no ninia komprensaun ba ema hotu, liuliu ba sira ne’ebé moris iha situasaun difisil ka ladún regulár.

Maibé ha’u hakarak dada imi-nia atensaun ba aspetu ida ne’ebé mosu dala barak iha Amu-Papa nia surat no nia omelia sira no ita sente katak aspetu ida ne’e halo parte “tradisaun saleziana”: ksolok! Amu-Pa­pa hahú ho surat “Evangelii Gaudium” (Evanjellu nia ksolok, ka Ksolok Evanjellu nian); iha Mensajen ba Loron Vokasaun nian, Papa Francisco ko’alia kona-ba “ha­tán ba bolun hodi tama iha ksolok komu­ñaun Maromak nian”. Nafatin ba foin-sa’e sira, iha Mensajen atu konvida sira ba Lo­ron Mundiál foin-sa’e sira nian, nia fó ha­noin ba joven sira katak ita hetan ksolok atu sai instrumentu mizerikórdia nian, no nia rekoñese katak foin-sa’e sira hamrook ba domin, damen, ksolok.

No ita labele haluha katak iha Valdocco, iha Reitór Mor no Família Saleziana nia prezensa, Papa Francisco sadik sira hodi dehan: “No mós lori foin-sa’e sira ba ksolok; ksolok salezianu mak buat ruma ne’ebé ha’u aprende no ha’u la bele haluha. Ksolok ida ne’e mai husi buat hotu ne’ebé Maromak haraik ba ita, ne’ebé furak”. No ikus mai “Amoris Laetitia” (domin nia ksolok, ka Ksolok domin nian): ninia títulu kontinua fó hanoin katak ksolok mak as­petu importante ida ba sarani sira.

Ita-nia Fundadór sira fó valór ba ksolok nu’udar dalan santidade no, se ita hanoin didi’ak, ita iha motivu barak atu haksolok: tanba ita sente Maro­mak nia prezensa iha ita-nia moris no nia la husik ita mesak iha situa­saun susar nian, tanba loron-loron, ho matan fiar nian, ita bele deskobre katak Maromak haraik buat ruma furak mai ita, tanba Nia hatene katak ita mak ema sala-na’in no Nia pron­tu nafatin atu perdua ita no hatudu ninia laran-sadia, tanba Na’i hadomi ita liuhusi ita-nia família, ita-nia belun no maluk sira. Ha’u hanoin katak se ida-idak koko atu reflete kona-ba ninia esperiénsia, bele hanaruk liután lista ida ne’e. Madre Maz­zarello repete dala barak katak “ksolok mak sinál husi fuan ida ne’ebé hadomi liu Na’i”: ita hotu (irmán, leigu no foin-sa’e sira) nu’udar Família Saleziana, aprende husi Maria atu hadomi Jezús no hana’i no haksolok ba buat kmanek ne’ebé Nia halo mai ita, nune’e, ita bele sente katak, Papa Francisco nia liafuan sira konvida ita atu bá kle’an iha ita-nia espíritu karizmátiku.

Iha fulan hirak ne’e ita iha motivu barak atu haksolok: irmán sira ne’ebé halo sira nia Primeira Profissaun, Ir. Maria Letizia nia aniversáriu tinan 50 nu’udar relijioza saleziana, Ir. Maria Assunta Sumiko Inoue nia vizita… iha akontesi­mentu sira-ne’e Maro­mak hatudu ninia domin no ita agradese Nia ho moris ida ne’ebé hak­solok no fó ksolok ba ema hotu.

 

Ir Alma Castagna