Liturjia sujere mai ita, reflesaun ida kona-ba osan no rikusoin seluk nia fatin iha ita-nia moris. Tuir Maromak nia Liafuan ne’ebé ohin propoin mai ita, Jezús nia eskolante sira tenke evita atu hakaran maka’as ba lukru manipula sira-nia moris no kondisiona sira-nia hilin sira; husi parte seluk sira simu bolun atu buka valór sira “Reinu” nian.

Iha leitura dahuluk, profeta Amós denunsia komersiante sira ne’ebé tanba preokupa de’it atu haboot sira-nia rikusoin ba beibeik, sira buka atu esplora ema kiak sira nia moris mukit no terus. Amós aviza: Maromak la hamutuk ho ida ne’ebé, tanba obsesaun ba lukru, halo nia maluk sira sai atan. Maromak la tolera esplorasaun no injustisa.

Evanjellu aprezenta ai-kanoik administradór ne’ebé matenek. Iha nia, Jezús oferese ba eskolante sira ezemplu kona-ba ema ida ne’ebé komprende katak soin sira mundu nian liu de’it no la folin  no uza sira atu asegura valór sira ne’ebé dura no konsistente… Jezús aviza eskolante sira atu halo hanesan.

Iha leitura daruak, autór Surat Dahuluk ba Timóteo konvida fiar-na’in sira atu halo sira-nia diálogu ho Maromak orasaun universál ida, iha ne’ebé hakohak maun-alin sira hotu, lahó esesaun, sira nia preokupasaun no terus. Tema la liga, diretamente, ho kestaun rikusoin nian (fundamentál iha liturjia domingu ne’e nian); maibé konvite atu la taka an iha an rasik no atu preokupa ho maun-alin sira nia terus no esperansa sira, lori ita ba tema hanesan: eskolante hetan konvite atu sai husi ninia egoízmu atu asume valór sira ne’ebé dura: domin, partilla, fraternidade.

Download