Festa Natividade Maria nian

Meditasaun Maromak Liafuan – 8 Setembru

Leitura

Liturjia festa ne’e nian aprezenta leitura rua (ba primeira leitura) atu hili. Ida uluk husi profeta Miqueias (Miq 5,1-4), anunsia Israel nia ukun-na’in ninia moris, ne’ebé sei bali povu ho Na’i nia kbiit. Miqueias mak hatudu sidade ninia moris-fatin, Belém, no refere kona-ba ida-ne’ebé sei tur ahi. Leitura seluk husi S. Paulo (Rm 8,28-30) no deskreve Maromak nia asaun ba ida ne’ebé Nia bolu. Iha Evanjellu (Mt1,1-16.18-23), Jezús nia jeneolojia lori ita atu kontempla kumprimentu eh realizasaun Maromak nia promesa iha Maria.

Meditasaun

Se ita lee ho atensaun jeneolojia, ita nota katak hahalok ‘hahoris” eh jera atribui de’it ba aman menus iha kazu José nian, Maria nia kaben, «husi nia moris Jezús hanaran Kristu». Mudansa ne’e hatudu Maria nia sentralidade iha Maromak nia projetu. Iha Jezús nia jeneolojia, iha lista ida naran sira-nian ne’ebé, dalabarak, la fó hanoin buat ida mai ita, bele halo ita sente deskonfortu. Maski nune’e liuhusi ema sira ne’e, iha-ne’ebé sira nia moris nakonu ho grasa no salan, mak Maromak no Na’i istória nian, kumpri Ninia promesa. Se, porezemplu, ita bá konsidera obra sira ne’ebé liurai sira Judá nian halo, ita sei la sente di’ak: natón de’it hanoin ba liurai boot David ne’ebé, hanesan fó hanoin mai ita, hahoris Salomão husi “ Urias nia feen”, soldadu ida ne’ebé David rasik haruka oho. Ita-nia istória mak istória iha-ne’ebé dalabarak  ema sira nia liberdade konkretiza ho hilin sira mate no violénsia nian, liufali hilin sira moris no damen nian. Maski nune’e, Maromak hili atu sai fiél ba Ninia promesa atu kontinua la’o ho ema sira to’o saran Ninia Oan-Mane rasik, atu ema sira hetan salvasaun husi sira-nia salan sira, hodi nune’e manifesta Ninia domin gratuitu, fiél no laran-sadia nian. No iha realizasaun Maromak nia projetu ida-ne’e mak ita komprende Maria nia papél. Iha Evanjellu sira la dehan buat ida kona-ba ninia moris (‘nascimento’), maibé anju Gabriel define nia “nakonu ho grasa”: nia ne’ebé, nafatin ba nafatin, Maromak hakonu no plasma/forma ho Ninia domin fiél no mizerikordiozu. Aleinde ne’e, Maria rasik define nia an nu’udar “Na’i nia atan-feto”, hodi revela ninia hakaran atu husik domin ne’e plasma no gia nia. Hodi hateke ba Maria ita husik ita-nia an atu Papa Francisco nia pergunta iha omelia nia propoin iha 8 Setembru 2014 provoka ita: «Ha’u husik atu Maromak la’o ho ha’u? Ha’u husik atu nia hamaus ha’u, tulun ha’u, perdua ha’u, lori ha’u bá oin atu to’o iha enkontru ho Jezús Kristu?».

Orasaun:

«Iha ita-nia fidelidade ha’u tau laran metin; ha’u-nia fuan sei bidu haksoit ho ita-nia salvasaun, ha’u sei hananu ba Na’i, ne’ebé halo di’ak mai ha’u» (Sal 13,6): Ho Salmu nia liafuan sira, ha’u esprime ha’u-nia hahí ba Na’i istória nian.

Asaun:

Hodi reza rozáriu, ha’u sei saran labarik sira ba Na’i.