RV – “Mizerikórdia mak salva”. Hodi foti inspirasaun husi Evanjellu Mateus nian (11,2-6), Papa Francisco gia Audénsia Jerál kuarta, 7 Setembru 2016 no temi João Batista nia “nakukun fuan nian”, ne’ebé la komprende Kristu nia “estilu diferente liu” atu atua – “instrumentu konkretu Aman nia mizerikórdia”.

“Justisa ne’ebé João Batista tau iha sentru ninia pregasaun nian, iha Jezús manifesta uluknanai nu’udar mizerikórdia. Ne’e mak Jezús ninia hahalok, ne’ebé halo sai vizivel no bele kona Maromak nia hahalok rasik”.

Amu-Papa hateten ne’e mak mensajen ba Kreda: “Maromak la haruka nia Oan-Mane mai mundu atu kondena maksalak sira nune’e mós harahun ema aat sira. Ba sira nia fó konvite ba konversaun atu, hodi haree Maromak nia laran-di’ak, sira bele hetan filafali dalan fila hikas nian”.

Hodi fó hanoin hikas Evanjellu Mateus nian, iha testu iha-ne’ebé Jezús hateten “ksolok ba sira ne’ebé la hetan motivu eskándalu nian”, Amu-Papa esplika katak “eskándalu signifika obstákulu”.

“Jezús ninia adverténsia nafatin atuál: ohin mós ema halo imajen sira Maromak nian ne’ebé bele impede nia atu sente Ninia prezensa reál”.

Husi avizu ne’e, Papa Francisco halo lista obstákulu lima ne’ebé atuál:

1. “Ema balun halo fiar ida “ó rasik halo” nian ne’ebé redús Maromak ba espasu limitadu ba dezeju rasik no konviksaun rasik. Maibé fiar ne’e la’ós konversaun ba Na’i ne’ebé revela an, iha kontráriu, impede Nia atu provoka ita-nia moris no ita-nia konxiénsia”.
2. “Ema seluk fali redús Maromak ba ídolu falsu ida; ida ne’ebé Ninia naran santu atu justifika interese rasik eh até ódiu no violénsia”.
3. “Ba seluk Maromak mak refújiu psikolójiku de’it atu hela seguru iha momentu difisil sira: ne’e mak fiar ne’ebé taka iha an rasik, la loke ba Jezús nia domin mizerikordiozu nia kbiit ne’ebé lori iha diresaun ba maun-alin sira”.
4. “Seluk tan konsidera Kristu nu’udar mestre di’ak de’it ho hanorin étiku sira, ida entre sira seluk iha istória”.
5. “Ikus, iha ema ne’ebé sufoka fiar iha relasaun intimista ho Jezús, hodi anula Ninia impulsu misionáriu ho kbiit atu transforma mundu no istória.

“Ita sarani sira fiar iha Jezús Kristu nia Maromak, no Ninia dezeju mak ida atu buras iha esperiénsia moris ninia mistériu domin nian”, Amu-Papa afirma.

Ikusmai, Amu-Papa husu atu ita haka’as an atu keta tau obstákulu ba Aman mizerikordiozu nia atuasaun, no husu don fiar nian, fiar ida ne’ebé boot atu ita mós “sai sinál no instrumentu sira mizerikórdia nian”.