Importante ba mundu Vida Konsagrada nian Surat “Iuvenescit Ecclesia” (“Kreda sai filafali joven), ne’ebé Kongregasaun ba Doutrina Fiar nian publika no aprezenta iha Sala Imprensa Vaticano iha loron 14 Juñu 2016. Dokumentu ne’e dirije ba Bispu sira Kreda Katólika nian.

Pontu sentrál dokumentu nian mak afirmasaun ko-esensialidade entre don ierárkiku no karizmátiku sira ne’ebé pertense “ba konstituisaun divina Kreda nian ne’ebé Jezús funda” (n. 10). Husi ne’e mai relasaun entre don ierárkiku sira no don karizmátiku sira.

Don ierárkiku sira Sakramentu Orden mak konfere (episkopál, saserdotál diakonál), enkuantu don karizmátiku sira Espíritu Santu mak fahe ho modu livre. Sira-nia ko-esensialidade la’ós de’it konstitutiva iha Kreda nia moris maibé folin liu atu “Kreda sai filafali joven ho forsa Evanjellu nian”, hafoun an, harii, no Espíritu mak gia “ho don ierárkiku no don karizmátiku oioin”. Hodi refere ba Kreda nia moris no misaun mak don ierárkiku no karizmátiku sira hetan sira-nia valór no papél, sira-nia relasaun maibé mós sira-nia relatividade.

Kard. Müller, iha aprezentasaun dokumentu ida-ne’e nian, depoizde fó hanoin katak “ho agregasaun, asosiasaun no movimentu ekleziál barak ne’ebé moris, nune’e mós Institutu foun vida konsagrada nian, depoizde Konsíliu Vaticano II”, oras-ne’e, loke ona tempu ida ba «maturidade ekleziál» (IE, 2).

Testu Iuvenescit Ecclesia ne’ebé hetan ona ninia fizionomia definitiva, hahú elabora husi tinan 2000 (publika iha 2016), no iha konsiderasaun kona-ba karizma sira, trasa mós liña fundamentál ruma, nu’udar kritériu dixernimentu nian ba autoridade ekleziál.

Durante ninia elaborasaun mosu faktu foun. Papa Francisco buka no buka daudaun atu tau ekilíbriu ba sentru gravidade atensaun nian, uluknanai hodi enfatiza kona-ba karizma no movimentu foun sira, hodi tau atensaun ekleziál boot liután ba karizma sira ne’ebé inkarna iha Institutu sira vida konsagrada nian.

Ko-esensialidade ne’ebé inspira Iuvenescit Ecclesia ne’e mak Papa Francisco dalabarak indika nu’udar prinsípiu no kritériu ne’ebé tenke gia mós ba revizaun dokumentu Mutuae relationes, hodi envolve Kongregasaun ba Vida konsagrada no Kongregasaun ba Bispu sira.

Foku iha dokumenu Iuvenescit Ecclesia mak karizma foun sira (foun iha sensu istóriku) no relasaun sira entre Asosiasaun no Movimentu foun sira ho don ierárkiku sira.

Kona-ba fenómenu boot Vida Konsagrada nian, parte esensiál Kreda nia vida no istória husi kedas nia hahú, ko’alia ho modu esplísitu iha n.22 iha kontestu Parte V kona-ba “Prátika ekeleziál relasaun entre don ierárkiku sira no don karizmátiku sira”:

 “Kontribuisaun don karizmátiku ida ba saserdósiu ministeriál hetan espresaun simbólika iha vida konsagrada; nune’e, nia tama iha dimensaun karizmátika Kreda nian. Karizma ne’ebé haraik, realiza «konformasaun espesiál ba Kristu virjen, kiak, obediente» nu’udar forma estavel moris nian liuhusi profisaun konsellu evanjéliku sira-nian «atu bele halibur fuan barak husi grasa batizmu nian». Institutu vida konsagrada sira nia espiritualidade bele sai, ba sarani leigu nune’e mós ba presbíteru, rekursu signifikativu ida atu moris vokasaun rasik. Aleinde ne’e, dalaruma, membru vida konsagrada nian, ho superiór rasik nia konsentimentu, bele hetan iha relasaun ho agregasaun foun sira apoiu importante ida atu moris vokasaun espesífika rasik no oferese, husi nia parte, «sasin ida ksolok nian, fiél no karizmátika kona-ba vida konsagrada», hodi nune’e bele realiza «hariku malu»”.

Iuvenescit Ecclesia util mós atu komprende no artikula relasaun mútua entre relijiozu/a sira ho bispu sira, entre identidade vida konsakrada no komuñaun ekleziál, tanba propoin dala ida tan doutrina Korpu místiku nian no Maromak nia Povu nian. Maibé ita presiza hein husi dokumentu foun Mutuae relationes nian formulasaun mediasaun jurídika foun sira no dinámika pastorál foun sira kona-ba ko-esensialidade entre don ierárkiuku no don karizmátiku sira iha forma Vida Konsagrada iha Kreda.