Liturjia domingu ne’e nian tau iha sentru reflesaun lójika Maromak nia domin nian. Nia sujere katak Maromak hadomi ema, ho domin rohan-laek no lahó kondisaun; no salan mós la haketak ita husi domin ne’e…

Leitura dahuluk aprezenta mai ita Jahwéh nia atitude laran-sadia nian hasoru Povu nia infidelidade. Iha epizódiu ida-ne’e – akontese iha Sinai, iha espasu jeográfiku aliansa nian – Maromak asume atitude ida ne’ebé sei repete dala barak iha istória salvasaun nian: nia halo nia domin boot liu hakaran atu kastigu ema maksalak.

Iha leitura daruak, Paulo fó hanoin kona-ba buat ne’ebé halo nia nafatin admira: Maromak nia domin ne’ebé hatudu iha Jezús Kristu. Domin ida-ne’e suli ho modu inkondisionál ba ema maksalak sira, hodi nakfilak no halo ema sai foun. Paulo mak ezemplu konkretu ida Maromak nia lójika nian; tanba ne’e, nia nunka husik atu fó sasin kona-ba Maromak nia domin no agradese Nia.

Evanjellu aprezenta mai ita Maromak ida ne’ebé hadomi ema hotu no ho modu espesiál, preokupa ho ema maksalak sira, ho sira ne’ebé eskluidu, ho sira ne’ebé marjinalijadu. Ai-kanoik “oan ne’ebé lakon”, ho modu espesiál, aprezenta Maromak nu’udar aman ida ne’ebé ehin ho ánsia nia oan rebelde, hakohak nia bainhira haree nia, no halo nia tama fali iha uma no mós halo festa boot isa atu selebra enkontru foun ho nia oan.

Download