BIOGRAFIA MADRE TERESA DE CALCUTÁ

(1910-1997)

 “Ha’u albaneza tuir raan, Indiana nu’udar sidadania. Kona-ba ha’u-nia fiar, ha’u Irmán katólika ida. Tuir ha’u-nia vokasaun, ha’u pretense ba mundu. Maibé kona-ba ha’u-nia fuan, ha’u pretense tomak ba Jezús nia Fuan”. Ho estatura ki’ik, maibé ho fiar metin hanesan fatuk-boot, ba Madre Teresa de Calcutá, Maromak entrega misaun atu haklaken Jezús nia domin ne’ebé hamrook ba umanidade, liuliu ba sira ne’ebé kiak liu iha kiak sira nia leet. “Maromak kontinua hadomi mundu no haruka ha’u no ó atu ita sai ninia domin no ninia kompaixaun ba ema kiak sira”. Nia mak klamar ida nakonu ho Kristu nia roman, lakan ho domin ba Nia no ho hakaran boot ida de’it: “halakon Ninia hamrook ba domin no ba klamar sira”.

Mensajeira nabilan Maromak nia domin nian ida-ne’e moris iha 26 Agostu 1910 iha Skopje, Albánia. Nia mak oan ki’ik liu husi oan na’in lima Nikola no Drane Bojaxhiu nian, naran sarani nian mak Gonxha Agnes, simu Primeira Komuñaun iha tinan lima ho balun no simu Krisma iha Novembru 1916. Husi loron Primeira Komuñaun nian domin ba klamar sira tama iha nia fuan. Nia aman ne’ebé mate derepente, bainhira Agnes foin tinan ualu, husik família iha difikuldade finanseira. Drane hakiak oan sira ho firmeza no domin, hodi influénsia maka’as ninia oan-feto nia karákter no vokasaun. Formasaun relijioza Gonxha nian hetan reforsu tan husi parókia Jezuita Jezús nia futar Fuan Santu, ne’ebé nia kompromete an ho modu ativa.

Ho tinan 18, tanba ninia hakaran atu sai misionária, Gonxha husik ninia uma  iha Setembru 1928, atu tama iha Institutu Beata Virjen Maria nian, koñesidu nu’udar “Irmán sira Loreto nian”, iha Irlándia. Iha-ne’ebá nia simu naran Mary Teresa, hanesan Santa Teresa de Lisieux. Iha Dezembru nia bá Índia, hodi to’o iha Calcutá iha 6 Janeiru 1929. Depoizde Profisaun votu temporáneu sira iha Maiu 1931, Ir Teresa simu knaar atu bá komunidade Loreto iha Entally no hanorin iha eskola ba menina sira, St. Mary. Iha 24 Maiu 1937 Ir Teresa halo Profisaun votu perpétua sira, hodi sai, hanesan nia rasik dehan: “Kristu nia espoza” ba “eternidade” tomak. Husi loron ne’ebá ema nafatin bolu nia Madre Teresa. Nia kontinua hanorin iha St. Mary no iha 1944 sai diretora eskola nian. Ema ho orasaun profunda no domin intensu ba Irmán maluk sira no ba ninia aluna sira, Madre Teresa hala’o tinan ruanulu ninia moris nian iha “Loreto” ho ksolok boot. Ema koñese nia ba ninia karidade, ba ninia jenerozidade no korajen, ba ninia tendénsia ba servisu todan no ba kapasidade naturál atu organiza, nia moris ninia konsagrasaun ba Jezús, entre Irmán maluk sira, ho fidelidade no ksolok.

Iha loron 10 Setembru 1946, durante viajen iha komboiu husi Calcutá ba Darjeeling ba ritiru anuál, Madre Teresa simu “inspirasaun”, ninia “bolun iha bolun nia laran”. Loron ne’ebá, ho modu oinsá karik, nia nunka fó sai, Jezús nia hamrook ba klamar sira possui nia, no ninia hakaran boot atu halakon Ninia hamrook sai fundamentu ba ninia ezisténsia. Iha semana sira no fulan sira tuirmai, liuhusi lokusaun no vizaun interiór, Jezús revela ninia Fuan nia hakaran ba “vítima domin nian” ne’ebé sei “habelar ninia domin ba klamar sira.” ”Mai, sai ha’u-nia roman”, Nia harohan. “Ha’u labele la’o mesak”, Nia revela Ninia sofrimentu atu haree abandonu ema kiak sira-nian, Ninia terus tan sira la koñese Nia no Ninia hakaran boot ba sira-nia domin. Jezús husu Madre Teresa atu funda komunidade relijioza ida, Misionária Karidade nian, dedika an atu serví kiak liu sira iha kiak sira nia leet. Molok Madre Teresa hetan lisensa atu hahú ninia misaun foun, ba tinan rua nia halo dixernimentu no verifika. Iha 17 Agostu 1948, ba dala uluk nia hatais sari mutin ho bordadu azúl no hakat sai husi odamatan ninia konventu doben “Loreto: atu tama iha mundu ema kiak sira-nian.

Halo tiha kursu badak ida ho ‘Suore Mediche Missionarie’ iha Patna, Madre Teresa bá filafali Calcutá no hetan alojamentu temporáneu iha ‘Piccole Sorelle dei Poveri’. Iha loron 21 Dezembru ba dala uluk nia bá iha perifeira sira: nia vizita família sira, fase labarik ruma nia kanek sira, tau matan ba katuas ida ne’ebé toba iha lurón tan moras no feto ida ne’ebé atu mate tan hamlaha no ho tuberkuloze. Loroloron nia hahú nia loron ho Jezús iha Eukaristia no sai ho Rozáriu iha liman, atu buka no serví Nia iha ema sira ne’ebé “ema lakohi, la hadomi, la kura”. Fulan ruma depois, ba hamutuk ho nia, ninia antiga aluna ruma.

Iha 7 Outubru 1950 Kongregasaun foun Misionária Karidade nian hetan rekoñesimentu ofisiál iha Arkidioseze Calcutá nian. Iha inísiu 1960 Madre Teresa hahú haruka ninia Irmán sira iha parte seluk Índia nian. Direitu Pontifísiu ne’ebé Paulo VI haraik ba Kongregasaun iha Fevereiru 1965 enkoraja nia atu loke uma ida misaun nian iha Venezuela. Depoizde ne’e, loke fundasaun seluk iha Roma no iha Tanzánia no, tuirmai iha kontinente hotu. Hahú hsui 1980 to’o 1990, Madre Teresa loke uma misaun nian iha kuaze nasaun komunista hotu, inklui eis Uniaun Soviétika, Albánia no Cuba.

Atu hatán di’ak liután ba ema kiak sira nia nesesidade, fízika no espirituál, Madre Teresa funda iha 1963 Irmaun Misionáriu Karidade nian; iha 1976 sanak kontemplativu Irmán sira-nian, iha 1979 Irmaun kontemplativu sira, no iha 1984 Padre Misionáriu Karidade nian. Maski nune’e, ninia inspirasaun la limita de’it ba vokasaun relijioza sira. Nia forma Kolaboradór/a Madre Teresa nian no Kolaboradór/a Ema Moras no terus nian, ema sira husi konfisaun oioin fiar no nasionalidade nian ne’ebé partilla ninia espíritu orasaun nian, simplisidade nian, sakrifísiu no ninia apostoladu obra umilde/haraik an sira domin nian. Espíritu ida-ne’e, tuirmai lori nia atu funda Misionáriu/a Karidade Leigu sira-nian. Atu hatán ba amlulik barak ninia pedidu, iha 1991 Madre Teresa loke hahú Movimentu Corpus Christi ba Amlulik sira nu’udar “dalan ki’ik ba santidade” ba sira ne’ebé hakarak partilla ninia karizma no espíritu.

Iha tinan sira espansaun lais ninia misaun nian, mundu hahú dirije atensaun ba Madre Teresa no obra ne’ebé nia hahú. Prémiu wain, hahú husi Prémiu Indianu Padmashri iha 1962 no husi ida relevante Prémiu Nobel ba Pás iha 1979, fó onra ba ninia obra sira, enkuantu mídia komesa tuir ninia atividade sira ho interese ne’ebé boot ba beibeik. Buat hotu nia simu, nu’udar rekoñesimentu eh nu’udar atensaun, “ba Maromak nia glória no hodi ema kiak sira nia naran”.

Vida no obra tomak Madre Teresa nian oferese sasin ksolok hadomi nian, grandeza no dignidade ema nian, valór buat ki’ik sira nian halo iha fidelidade no domin, no amizade inkomparavel ho Maromak. Maibé iha aspetu eroiku seluk feto maka’as ida-ne’e nian ne’ebé ema hatene de’it depoizde ninia mate. Hasumik iha ema hotu nia matan, haksumik mós ba sira ne’ebé besik liu nia, ninia moris interiór karakteriza ho esperiénsia kle’an ida, terus nian no sentimentu permanente dook nian husi Maromak, to’o sente Maromak hewai nia, hamutuk ho dezeju boot ba Nia. Nia hanaran ninia provasaun interiór: “nakukun”. “Kalan terus” ninia klamar nian, ne’ebé hahú iha periódu ne’ebé nia hahú nina apostoladu ho ema kiak sira dura ba moris tomak, lori Madre Teresa ba uniaun kle’an liután ho Maromak. Liuhusi nakukun ne’e nia partisipa ho modu místiku ba Jezús nia hamrook, ba Ninia hakaran ne’e’e haterus no maka’as, domin nian, no partilla ema kiak sira inia dezolasaun interiór.

Durante tinan ikus sira nia moris nian, maski problema sériu saude nian aumenta, Madre Teresa kontinua gia ninia Kongregasaun no hatán ba ema kiak no Kreda nia nesesidade sira. Iha 1997 Madre Teresa nia Irmán sira 3.842, prezente iha uma 594 misaun nian namkari iha nasaun 120 mundu nian. Iha Marsu 1997 nia fó bensan ba Superiora Jerál Misionária Karidade eleita foun no sei halo viajen ida ba estranjeiru. Depoizde hasoru Papa João Paulo II ba dala ikus, nia fila hikas ba Calcutá no pasa ninia semana ikus sira moris nian hodi simu vizita-na’in sira no hanorin ninia Irmán sira. Iha 5 Setembru Madre Teresa nia moris iha rai remata. Husi parte Governu Indianu nian fó ba nia funerál Estadu nian no ninia isin hakoi iha ‘Casa Madre’ Misionária Karidade sira-nian. Ninia rate lalais de’it sai fatin pergrinasaun no orasaun nian ba ema husi fiar oioin, kiak no riku, lahó distinsaun ida. Madre Teresa husik hela mai ita testamentu ida fiar ne’ebé la nakdoko, esperansa ne’ebé la lakon no karidade estraordinária. Ninia resposta ba Jezús nia pedidu: “Mai, sai ha’u-nia roman”, halo nia sai Misionária Karidade nian, “ema kiak sira nia Inan”, símbolu kompaixaun nian ba mundu no sasin moris Maromak nia domin ne’ebé hamrook.

La to’o tinan rua liutiha nia mate, tanba fama santidade ne’ebé habelar no grasa sira ne’ebé simu liuhusi ninia intersesaun, Papa João Paulo II fó lisensa atu loke Kauza Kanonizasaun nian. Iha 20 Dezembru 2002 nia aprova dekretu kona-ba ninia virtude eroika no milagre.

Papa João Paulo II beatifika nia iha 19 Outubru 2003. Papa Francisco kanoniza nia iha 4 Setembru 2016, iha Tinan Santu Mizerikórdia nian.