Venilale – Iha 30/08/2016 ami komunidade Maria Auxiliadora (MA) hamutuk ho labarik orfan sira, simu Me. Assunta Sumiko Inoue, iha simplisidade no iha ambiente ksolok nian. Me. Assunta nia vizita halo ami sai ida de’it. Ida ne’e mak realidade ksolok nian ne’ebé ita nia kongregasaun esperiénsia. Maski ita nia kor kulit isin nian la hanesan, fuk la hanesan, kultura la hanesan maibé ita hamutuk forma kor oioin ne’ebé sai ida de’it hodi hamoris karizma Don Bosco no Madre Mazzarello nian iha mundu ohin loron. Atu dehan; kor sira sei mohu de’it bainhira laiha Inan ida ne’ebé hametin ita nia forsa hodi sai sasin Kristu Nia domin iha ita nia moris.

Iha loron 01/09/2016, Me. Assunta  halo nia enkontru ho Aspirante na’in 5. Molok fó konferensia ba sira, sira ida-idak aprezenta uluk sira nia-an. Nune’e Me. Assunta hateten; ha’u kontenti hasoru imi mesak. Imi foin mak hahu disernimentu importante, imi iha dezeju ida hakarak sai FMA.

Tuir mai Madre Assunta husu perguntas ba sira dehan; tansa imi mai iha ne’e? Ida-idak  dehan nia naran no dehan tansá ha’u hakarak sai madre?

• Agustinha Lopes Magno: Ha’u hahu husi kiik kedas hela iha orfanato Laga, ha’u haree madre sira nia moris ha’u hakarak fó mós ha’u nia moris ba foin-sa’e no labarik kiak sira.

• Silvia Boavida: husi kiik kedas hamutuk ho madre sira ba oratóriu no sai mós animadora iha oratóriu. Ha’u escola iha Padre salesiano sira nian, ikus mai ha’u hetan madre ida ha’u husu! Madre iha formasaun ba sai Madre nian ka? Madre ne’e konvida ha’u, tau ha’u nia naran no akompaña ha’u to’o koñese sira nia moris.
• Adelaide Fernandes Almeida: Ha’u tama iha ne’e liu husi esperiénsia animadores iha oratóriu salesiano. Ha’u hakarak buka deskobre Na’i nia hakarak mai ha’u, hodi serbi Nia liu husi ema seluk ne’ebé ha’u hasoru iha moris.
• Adelia da Costa soares: Ha’u la koñese madre FMA no padre salesiano sira, maibé husi belun sira, konvida ha’u partisipa iha festa sira, ha’u haree Irman sira haksolok, halo ha’u mós hakarak tama no koko, oinsá lori foin-sa’e no labarik sira ba Maromak. Ha’u nia papa lakohi ha’u tuir vokasaun sai madre, maibé ho Na’i nia tulun loke ha’u nia papa nia fuan hodi husik ha’u tama iha salesiana.
• Natalia Matiza: ha’u koñese Madre sira liu husi padre Salesiano sira, tulun ha’u tama iha salesiana.

Me. Assunta haforsa liután resposta ne’e nia dehan; furak sé ita hatene mós belun seluk nia istória kona-ba vokasaun.

• Imi dada iis ona ho iis espíritu salesiana nian; moris fraterna, espíritu família no hadomi malu.
• Espoza ida tenke fó moris iha nia uma kain
• Madre sira Jezús nia fen no komunidade ida-idak sai ita nia família rasik
• Imi tenke hahu kedas sente espíritu família entre imi. La’os fasil atu moris hamutuk tanba ita ida-idak iha nia karakter no nia tradisaun/kultura.
• Iha ne’e imi hahu atu simu ema nia diversidade, lao suporta malu simu malu ho domin no perdua nafatin
• Sente ita ema ne’ebé Maromak bolu, ita nia vokasaun mai husi Maromak de’it
• Ha’u hakarak sai FMA, ida ne’e ita nia hakarak maibé ita lahatene sé Maromak hakarak ka lae. Tan ne’e presiza orientasaun iha periodo volontária, Pre noAspirante, Postulante no Novisa. Maromak iha nia mehi ba ita, ita nia kna’ar mak buka deskobre Jezús nia mehi ba ita.
• Ida ne’ebé sente sai FMA sente liu ksolok no kontínua sai di’ak.
• Madre la dehan difikuldades la iha, imi sei hetan difikuldade barak. Maski iha difikuldade laran, imi sente katak Maromak bolu ha’u.
• Loron ne’ebé imi manan difikuldade imi sei sai metin no forte liután iha imi nia fiar. Aprende haree ho Jezús nia matan.

Iha momentu hotu – hotu ita husu; Jezús, Ita hakarak ha’u sai oinsá? Resposta mak husi buat ne’ebé ita hetan buka haree ho matan posotivu, Madre mós konvida sira hakbesik ba Jezús loro-loron. Jezús sei hatudu ba imi dalan ne’ebé imi sei ba. Keta tauk atu tuir Jezús, ha’u mehi imi nain lima sai FMA maibé sé Jezús mehi sai inan ida, buka harii umakain ida ne’ebé di’ak, bele mós sai Salesiano kooperadores,  no VDB. Ita sei hetan Maromak nia mehi. Ita sente livre atu simu Maromak nia vontade. Aprende loke fuan ba Madre sira.

(Esmeralda Soares)