Iha tempu komemorasaun tinan 10 independénsia Timor-Leste nian,  governu ho parseiru dezenvolvimentu sira organiza atividade oioin…balun ba “ema boot sira”, balun ba ema ki’ik sira. Entre atividade sira ne’e  maka konsertu musikál, inaugurasaun muzeu rezisténsia nian, expo husi Koreia, husi país lia-portugés, no expo anuál ba produtu sira iha rai-laran husi loron 28 Maiu-1 Juñu. Partisipa iha expo ida-ne’e grupu oioin husi governu to’o seitór privadu atu hatudu no fa’an produtu oioin ne’ebé ida-idak iha.

Nune’e mak oportunidade ne’e uza mós husi “antiga aluna FMA” nian ho sira-nia produtu hahán oioin hanesan katupa to’o bakso, enkuantu “Mazzarello bakery no sewing” lori produtu suku nian husi tais no produtu pastelaria nian. Buat ne’ebé improtante mak, loos duni, hudi produtu sira-ne’e hatudu duni katak foin-sa’e sira ne’ebé uluk hetan formasaun iha eskola tékniku-profisionál FMA sira-nian , la’ós de’it iha kapasidade atu kompete tanba skills no kompeténsia ne’ebé iha iha merkadu servisu nian, maibé sira mós partisipa iha dezenvolvimentu País nian ho sira-nia serbisu tuir sira-nia área kompeténsia nian. Oportunidade expo ne’e mós tulun atu haree grupu seluk nia produtu nune’e aprende mós husi sira, oinsá haburas liután kualidade produsaun nian.