RV – Mizerikórdia oferese dignidade. Ne’e mak tema katekeze Papa Francisco nian iha kuarta, 31 Agostu, iha Prasa S. Pedro. Papa Francisco tau nu’udar baze ba ninia reflesaun sira relatu bíbliku kona-ba feto ne’ebé salva tanba ninia fiar, hodi tau énfaze katak Maromak sempre akolle sira ne’ebé sosiedade deskarta eh soe.

Download

Testu Evanjellu Mateus nian (Mt 9,20-22) haktuir epizódiu Jezús kura feto ida moras emorrajia. Tanba problema ida-ne’e, ema konsidera nia foer/impura no ezkluida husi sosiedade. Tuir Papa Francisco, kazu ida-ne’e halo ita reflete kona-ba oinsá make ma baibain haree no reprezenta feto.

“Ita hotu iha devér atu tau atensaun, iha komunidade sarani sira mós, ho vizaun sira feminilidade nian nakonu ho prekonseitu sira no suspeita sira ne’ebé hakanek feto nia dignidade intanjivel”, Amu-Papa fó hanoin.

Jezús admira feto ne’e nia fiar no nia iha hateken mizerikórdia no ternura nian ba nia, hodi nakfilak ninia esperansa iha salvasaun. “Ne’e signifika katak Jezús la akolle de’it, maibé konsidera feto ne’e soi ba enkontru ne’e to’o pontu dirije Ninia liafuan no atensaun ba nia”.

Jezús nia enkorajamentu – “korajen, oan-feto, o-nia fiar salva ó” – nalian mós ohin, Amu-Papa dehan, tanba nia espresa Maromak nia mizerikórdia ba ema deskartada sira.

“Dala hira mak ita sente deskaradu interiormente tanba ita-mia salan sira, ne’ebé ita halo barak, ne’ebé ita halo barak. No Na’i dehan mai ita: ‘korajen, mai, mai ha’u ó la’ós deskartadu. Korajen oan-mane, ó oan-mane ida no oan-feto ida. Momentu grasa nian ida-ne’e, perdaun nian, momentu inkluzaun iha Jezús nia vida, Igreja nian, mizerikórdia nian. Ohin ita hotu, sala-na’in boot eh ki’ik, maibé hotu-hotu sala-na’in, Na’i dehan mai ita: ‘mai. Ha’u hakohak ó, ha’u perdua ó’. Maromak nia mizerikórdia nune’e. Ita tenke iha korajen no bá to’o Nia, husu perdaun ba ita-nia salan sira no la’o ba oin ho korajen hanesna feto ne’e halo”.